December 12, 2007

GENER B AMANTE,
BALIK SA PANGULUHAN NG LIGA

SAN PABLO CITY – Sa pamamagitan ng 58 boto na ipinagkatiwala sa kanya, si first term Punong Barangay Gener B. Amante ng Barangay San Jose ay napagwagian ang pagiging Panguo ng Liga ng mga Barangay sa Lunsod ng San Pablo sa halalang ginanap sa Rizal Hall ng San Pablo City Central School ng noong Martes ng umaga, Disyembre 11, 2007 ng naaayon sa alituntuning itinatakda ng Local Government Code of 1991 o Batas Republika Bilang 7160..

Sa isang paalaalalang pagpapayo o advisory na pinalabas ni Local Government Secretary Ronaldo Puno ay kanyang ipinaunawang ang panunungkulan ng lahat ng Pangulo ng Liga ng mga Barangay, at Tagapangulo ng Pederasyon ng Sangguniang Kabataan na nahalal noong 2002 ay natapos na noong Oktubre 31, 2007 matapos maganap ang October 29, 2007 Synchronized Barangay and Sangguniang Kabataan Elections, kaya tulad ni Del Remedio SK Chairman Kristine Ann A. Picazo na nauna nang halal na Pangulo ng Pederasyon ng Sangguniang Kabataan sa Lunsod ng San Pablo, si San Jose Punong Barangay Gener B. Amante ay magsisimula ng manungkulan bilang ex-officio member ng Sangguniang Panglunsod, matapos na pormal na makapanumpa sa katungkulan, at mapadalahan ng kopya ng kanilang panunumpa ang Tanggapan ng Kagawaran ng Interyor at Pamahalaang Lokal.

Ang iba pang nahalal na sa bagong pamunuan ng Liga ng mga Barangay, na ang panunungkulan ay hanggang sa Nobyembre 30, 2010 ay sina Punong Barangay Carmelita A. Amante ng Sta. Maria Magdalena, pangalawang pangulo; Punong Barangay Arnel C. Ticzon ng Barangay III-D, tagasuri; Mga director sina Punong Barangay Napoleon C. Calatraba ng Del Remedio, Punong Barangay Crisante G. Almare ng San Ignacio; Punong Barangay Balbino A. Escueta ng San Juan; Punong Barangay Edgardo A. Aquino ng San Lucas II; Punong Barangay Ramon B. Panganiban ng Barangay II-C; Punong Barangay Pedro D. Malabuyoc ng Barangay IV-C; Punong Barangay Dorben A. Roa ng Santa Elena; at Punong Barangay Bernardo S. Morta Jr. ng Barangay VII-A.

Ang manunungkulanng Kalihim ng Liga at Ingat Yaman ng Liga ay kapuwa itinatalaga ng Pangulo sang-ayon sa umiiral na alituntunin na may kaugnayan sa paghalal sa pamunuan ng Liga ng mga Barangay sa antas ng lunsod at ng munisipyo na ipinaiiral ng DILG. (Ben Taningco)

December 11, 2007

HB 2662 NI IVY ARAGO, PANGANGAILANGAN

SAN PABLO CITY- Ikinatutuwa ng mga may tunay na pagmamahal at malasakit sa kagalingan ng lunsod ang paghahain ni Congresswoman Ma. Evita “Ivy” Roda Arago ng House Bill No. 2662 sa Malaking Kapulungan ng Kongreso, na nagpapanukalang ibalik mula sa poder ng Laguna Lake Development Authority (LLDA) ang pagmamay-ari, pananagutan, at pangangasiwa sa pitong (7) lawa sa Pangasiwaang Lunsod ng San Pablo. Sapagka’t walang magmamalasakit sa kalikasan ng lunsod kundi mismong ang mga taga-lunsod na rin, at dapat ding isiping ang pitong lawa ay hindi lamang para sa mga mangingisda, kundi para sa kabuuan ng lahat ng mamamayan ng lunsod.

Isang dating pinunonglunsod ang nagsabing pagkalipas ng dalawang (2) dekada ay saka lamang nagkaroon ng kinatawan ang Ika-3 Distrito ng Laguna sa Kongreso na nalamam, nadarama, at higit sa lahat ay may tunay na makasakit sa kapakanan at kagalingan ng isang mahalagang likas-yaman ng lunsod na ang kabuuan ng lunsod ang dapat makinabang.
Si Congresswoman Arago ay hindi ang may uring “Aye Sir” sapagka’t ang kanyang katapatan ay sa mga mamamayang naglagay sa kanya sa katungkulan, kaya ngayon ay unti-unti niyang naibabalik ang pagtitiwala ng mga mamamayan sa Office of the Representative of the Third District of Laguna, dugtong pa ng dating political leader.

Ang Laguna Lake Development Authority (LLDA) ay nabalangkas at nabuo bilang isang ahensya ng pamahalaan sa bisa ng Batas Republika Bilang 4850 na inakda ni Senador Wenceslao Rancap Lagumbay na napagtibay noong
Hulyo 18, 1966 sa layuning mapangalagaan at mapaunlad ang Laguna de Bay sapagka’t noon ay aapat (4) na metro na ang lalim nito, at nagsisimula ng maging marumi dahil sa mga umuusbong na industriya sa kapaligiran nito, at paglaki ng populasyon sa baybayin ng lawa. Para higit pang magkaroon ng ngipin ang batas, ito ay nasusugan noong Oktubre 17, 1975 ng Presidential Decree No. 813. At nasakop ng LLDA ang pitong (7) lawa sa bisa ng pagtibayin ni Pangulong Ferdinand E. Marcos ang Executive Order No. 927 noong December 16, 1983 na nagpapalawak sa sakop ng Laguna de Bay Region upang mapasailalim ng LLDA ang lahat ng lawa at ilog sa mga Lunsod ng San Pablo, Pasay, Caloocan, Quezon, Maynila at Tagaytay; mga Munisipyo ng Tanauan, Sto. Tomas at Malvar sa Batangas’ mga Munisipyo ng Silang at Carmona sa Cavite; Munisipyo ng Lucban sa Quezon; at mga Munisipyo ng Marikina, Pasig, Taguig, Muntinlupa, at Pateros sa Metro Manila.

Malawak ang kapangyarihan ng LLDA subalit walang direktang pananagutan sa mga San Pableño. Marami ang naghahalintulad sa LLDA mother agency nitong Department of Environment and Natural Resources. HInihikayat ang lahat na tumulong upang masagkaan ang masamang epekto ng Climate Change. Ang lahat ng kaparaanan ay ginagawa ng lahat kabilang ang pag-iwas na makadagdag pa ng lason sa himpapawid at pagbibigay ng mga rekomendasyong dapat gawin, tulad ng pagpapalawak ng forest cover upang maibsan ang climate change, ngunit ang DENR na patuloy sa pagpapalabas ng logging permit. Nang mabuo ang LLDA, ang lalim ng Laguna de Bay ay apat (4) na metro. Ngayon ang Laguna de Bay ay may average depth na dalawang (2) metro, at ang antas ng uri ng tubig nito ay nasa pinakamababang antas upang huwag lamang maalis ang Laguna Lake sa talaan ng Living Lakes sa daigdig.

Isang dating konsehal ang nalulungkot sa kasalukuyang kalalagayan ng pitong lawa, na nasa daan na para ang lunsod ay matawag na “City of Polluted Seven Lakes,” at kapansinpansing ang kilos at ipinatutupad na palatuntunan ng LLDA ay pumapatay sa mga nasabing lawa. Katunayan sa pag-aaral ng mga siyentista at kaanib ng UP Archeological Society na nagmasid sa pitong (7) lawa sa lunsod ay wala nang nabubuhay na isda sa malalim na bahagi ng Sampaloc Lake. At nang sila’y makaahon ay nagsipag-daingan sa baho ng kanilang diving suits na nagpapatunay na mabaho ang tubig sa ilalim ng lawa.

May opinion si dating Presidential Legal Adviser at ngayon ay Justice Antonio Carpio, pagtugon sa katanungan noon ni Alkalde Zacarias A. Ticzon na isa ring abogado, ay mababalik lamang ang pagkamay-ari at karapatan sa pangangasiwa sa Pitong (7) sa pamamagitan ng isang batas, kaya marami ang humahanga sa ipinakikita ni Congresswoman Ma. Evita R Aragon a tunay na malasakit para sa kapakanan ng Pitong (7) Law ng lunsod. Alam niya ang batas para masusugan ang isang batas para maisabatas ang pagbabalik sa Pitong (7) Lawa sa mga Mamamayan ng Lunsod ng San Pablo.

Isang kilalang lider sibiko sa lunsod ang nagmumungkahi sa mga taga-lunsod ng San Pablo, at Lalawigan ng Laguna, na sulatan nila ang mga kongresistang alam nila ang pangalan, para suportahan ang House Bill No. 2662 na kasalukuyang isinusulong ni Congresswoman Ma. Evita Roda Arago. (Sandy Belarmino/ 7LPC)

December 10, 2007

PEBRERO, BUWAN NG PHILHEALTH

Si dating Senador Juan Martin Flavier (kanan) samantalang nanunumpa kay Health Secretary Francisco T. Duque III bilang kagawad ng Board of Directors ng PhilHealth.

Sa pamamagitan ng Proclamation No. 1400, sa layuning maikintal sa kaisipan ng mga mamamayan ang halaga ng papel na ginagampanan ng Philippine Health Insurance Corporation (PhilHealth) , na isang palatuntunang panglipunan, ang Buwan ng Pebrero ng bawa’t taon, na magsisimula sa Taong 2008, ay ipinahahayag na PhilHealth Month.


Ang PhilHealth na isang Government Owned and Controlled Corporation upang magpatupad ng Pambansang Palatuntunan sa Kaseguruhang Pangkalausugan o National Health Insurance Program ay natatag sa bisa ng Batas Republika Bilang 7875 na napagtibay noong Pebrero 14, 1995, at nagsimulang akuin ang pananagutan sa pagpapatupad ng dating Medicare Program para sa sektor ng mga pinuno at kawani ng pamahalaan simula noong Oktubre ng 1997 ng ilipat ng Government Service Insurance System (GSIS) ang pondo ukol ditto, at ang para sa pribadong sektor ay noong April ng 1998 matapos na ang pondo ay ilipat ng Social Security System (SSS).


Ang batas na nagtatag sa PhilHealth ay itinaguyod sa Malaking Kapulungan ni Kinatawan Wilfrido L. Enverga at sa Senado ni Senador Edgardo J. Angara. Samantala, si dating Senador Juan M. Flavier na naging masugid na tapagtaguyod sa pagpapaunlad ng Medicare Program sa bansa ay natalaga kamakailan bilang Board Member ng Philippine Health Insurance Corporation.


Ayon kay Dr. Carmelita Laureano, Assistant Vice President for Region IV-A, ang limang (5) pangunahing palatuntunang ipinatutupad ng PhilHealth ay ang pagkakaloob ng kaseguruhang pangkalusugan sa mga may palagiang gawain o employed sector; mga may sariling gawain at pinagkakakitaan o informal sector; mga manggagawa sa labas ng bansa o overseas worker; mga hindi na nagsisipagbayad na miyembro o mga retiradong kawani at manggagawa; at mga tinatangkilik o sponsored members.


Idinagdag pa ni Dra. Laureano na ang PhilHealth ay nagkakaloob ng nagkakaisang mataas ang uring paglilingkod na pangangalagang pangkalusugan sa lahat ng sakop nito, tulad ng tulong para sa pagtigil sa pagamutan, tulong na pambili ng gamut, at kaupahan sa mga manggagamot at laboratory examination. Ang PhilHealth ay mayroon ding mga tanging palatuntunan para sa mga manganganak, pangangalaga at pangangasiwa sa mga kasisilang pa lamang na sanggol o newborn care, at pagpapagamot sa mga dinapuan ng tuberkolusis na tinatawag na TB-DOTS Packages.


Simula noong Taong 2002, ay taunang ipinahahayag ng Pangulo ang pagdiriwang ng PhilHealth Week o PhilHealth Month, at sa bias ng Proclamation No. 1400, ang pagdiriwang sa Buwan ng Pebrero bilang Buwan ng PhilHealth ay magiging palagian na o magiging isa ng institusyong pambansa, paglilinaw ni AVP Carmelita A. Laureano. (Ben Taningco)

Sign Up Now!!!!

Sign up for PayPal and start accepting credit card payments instantly.

Disqus for Balitang San Pablo : Online