October 31, 2008

KASUNDUAN SA PAGIGING MAGKAPATID


SANTA ROSA CITY - Sa bisa ng isang kasunduang pinagtibay nina yor Arlene Arcillas-Nazareno at Mayor Jejomar C. Binay noong nakaraang Martes, Oktubre 28, 2008 ay naging pormal ang pagiging magkapatid na lunsod ng lunsod na ito at ng Lunsod ng Makati. Ang Lunsod ng Makati ang kinikilalang “financial and commercial center” ng Pilipinas, samantala ang Lunsod ng Santa Rosa ang tinatagurian ngayong “the past rising investment center in South Luzon.”

Sa pahayag ni Mayor Arlene Arcillas-Nazareno, kanyang nabanggit na malaki ang maitutulong ng pagiging magkapatid na lunsod ng Santa Rosa at ng Makati para maging tuwiran at masigla ang pagpapalitan ng kamalayan at kasanayan sa larangan ng siyensya at teknolohiya, pagpapaunlad ng pamayanan, pagpapataas ng antas ng edukasyon, pangangalaga sa kapaligiran, at mga paglilingkod na pangkalusugan at panglipunan.

Hindi na malayong maging pormal ng tawagin ang lunsod na ito na “New Makati” o “Makati of the South,” na ayon kay Mayor Nazareno ay magpapasigla sa nagaganap na pagiging sentro ng kalakalan ng Lunsod ng Santa Rosa

Bilang tugon sa binanggit ni Mayor Nazareno na pangangailangang maitaas ang sistema ng pangasiwaang lokal, kaagad ay ipinahayag ni Mayor Binay na handa niyang tulungan na sanayin ang mga pangunahing pinuno ng mga kagawaran ng ingat-yaman, ng tasador, at ng inhenyeriya, at nais din niyang ibahagi ang karanasan ng Pangasiwaang Lokal ng Makati sa paggamit sa information technology upang ang pangasiwaang lokal ay makatipid sa operasyon, at mapalaki ang kita sa pamamagitan ng computerization.

Ang naganap na pagkapaglagdaan ng sisterhood agreement ay nagsimula pa noong Hulyo ng 2007 kung kailan nagkaroon ng pag-uusap ang mga kinatawan ng dalawang pangasiwaang lokal, hanggang sa nakapagpatibay ng kanikanilang resolusyon ang dalawang sangguniang panglunsod na nagbigay daan upang pormal na malagdaan ang unawaan noong nakaraang Martes. (Ben Taningco)

NUTRICOMNET - CALABARZON


Sa pulong na ginanap sa Hipolito B. Aycardo Hall ng DOST-IV-A masayang nagpapalitan ng kuro-kuro ang mga lider ng re-organisado at pinasiglang Nutrition Communication Network (NUTRICOMNET)-CALABARZON upang mabalangkas ang palatuntunan upang maipalaganap sa CALABARZON Provinces ang tamang kamalayan ukol sa bunga ng mga pananaliksik at pagpapaunlad na sinasagawa ng Food and Nutrition Research Institute (FNRI). Sila ay sina (mula sa kaliwa) FRNI Science Research Specialist Charina A. Javier, Laguna Score’s Mar Diozon, NUTRICOM Vice Chairman, FRNI Deputy Director Zenaida V. Narciso, at ABS-CBN Radio DZMM Correspondent Vic Pambuan, NUTRICOMNET Chairman. (Ben Taningco)

Kabataang San Pableño, Pambato ng Laguna


Tatlong first year college student sa Lunsod ng San Pablo ang napasama sa 5-man Provincial Team ng Laguna na lalahok sa regional elimination contest sa darating na Nobyembre 13, 2008 sa Lipa City upang mapili ang kakatawan sa CALABARZON Provinces sa 17th Philippine Statistics Quiz na magkatuwang na itinataguyod ng National Statistics Office at Philippine Statistical Association, Inc. na gaganapin sa Maynila sa Disyembre 4, 2008. Sila ay sina (mula sa kaliwa) France Camille A. Credo ng Laguna College na tumapos ng high school sa Laguna College, 3rd place; Jeric Bryan A. Yaneza ng STI-San Pablo City, na tumapos na tumapos ng high school sa San Jose (Malamig) National High School, 4th place; at Mary Ariane H. Imbo ng Laguna College, na tumapos ng high school sa Laguna College, 5th place. Ang first placer ay si Heinrich Sean F. Fabregas ng UPLB College of Arts and Sciences na tumapos ng high school sa Lipa City National Science High School, samantala ang 2nd place ay si Marc Victor F. Gallenito na kumukuha ng B. S. Statistics sa UPLB na tumapos ng high school sa Gallonosa National High School sa Sorsogon.Ang Provincial Elimination ay ginanap sa Cultural Center of Laguna sa Santa Cruz noong Miyerkoles ng hapon sa pangangasiwa ng National Statistics Office-Laguna Provincial Office sa tulong ng Tanggapan ng Punonglalawigan. (Ben Taningco)

October 28, 2008

KILUSAN PARA SA MAAYOS NA PANGANGASIWA NG BAYAN


SAN PABLO CITY - Sa personal na pamamatnubay ni former City Vice Mayor Celia Conducto Lopez bilang National Coordinator para sa Convenor Group ay pormal na inilunsad sa Max’s Restaurant dito noong nakaraang Lunes, Oktubre 27, 2007, ang Movement for Good Governance na ang pangunahing layunin ay magabayan ang mga mamamayan sa paghalal sa isang pinunong bayan na subok na ang kakayanan sa pagpapatakbo ng pamahalaan o pagpapakilos ng isang pangangasiwaan.

Ang pagkakaroon ng maayos na pangangasiwa sa pamahalaan ang dapat kilalaning sukatan ng pagiral ng tunay na kalayaan, ayon sa tagapagsalita ng kilusan, kaya ang dapat iluklok sa katungkulan ay yaong nagtataglay na ng sapat na kamalayan sa pangangasiwa, at hindi iyong mag-aaral pa bilang tagapagpaganap.

Kasama ni Gng. Celia Lopez sa convenor’s group sina Philip Araneta bilang tagapag-ugnay sa Batangas, Roy Cervantes tagapag-ugnay para sa Bicolandia; Rey Lacunas bilang tagapag-ugnay para sa Albay; Abner Lim para sa Quezon; Atty. Alvin Arevalo para sa MIMAROPA Area; Atty. Gil Sotto para sa Laguna; Bro. Criz Bagsic para sa grupo ng mga relihiyoso; at Evangeline Mendoza ng Ugnayan ng ng mga Nagsasariling Organisasyon sa Kanayunan. Si Dr. Tomas A. Maneses ang tagapagsalita.

Naninindigan sina Lopez na pinapangarap ng bawa’t Pilipino na magkaroon ng isang mahusay na pamahalaan na pinangangasiwaan ng mga matatapat at mararangal na lingkod bayan.

Bilang isang kiluasan ay kailangan ng movement ang mga kasapi, subali’t binigyang-diin ni Lopez na ang pagsapi ay kusangloob o boluntaryo, at ang pangunahing magiging gawain ay ang pagtataguyod ng mga seminar at talakayan sa mga kampus ng paaralan upang ang paghalal ng tamang lider ay maging bahagi ng pagpapahalaga ng mga mamamayan, lalo na ng mga kabataan. Naniniwala ang Kilusan sa pangangailangan sa isang mapayapang pagkilos ng buong sambayanan upang makamit ang mga minimithing adhikain, kaya kinakailangan na “Makialam Ka Na,” at maging bahagi ng isang maayos daluyan ng magagandang kaisipan na magbubunga ng pagluluklok sa katungkulan ng mga lider na Maka-Dios, makatao, makabayan, maayos, matapat, at mahusay sa pamamahala. (Ben Taningco)

October 27, 2008

KASIGLAHAN TODO BIGAY Year 4


KAMPYON SA AWITAN – Si Lhea Marie Deangkinay Hernandez (inset),14 taong gulang ng Barangay Santiago II, at 3rd year high school student sa San Pablo Colleges, ang tinanghal na kampyon sa Kategoriya ng 16 taong gulang pababa, at nagtamo ng gantimpalang P10,000-cash sa Kasiglahan Todo Bigay Year 4 na itinaguyod ni ABC President Gener B. Amante para sa Liga ng mga Barangay sa Lunsod ng San Pablo, na ang grand final ay ginanap noong Linggo ng gabi, at maiuugnay sa pagdiriwang ng kaarawan ni Mayor Vicente B. Amante ngayong Lunes, Oktubre 27. (Ben Taningco)

Sign Up Now!!!!

Sign up for PayPal and start accepting credit card payments instantly.

Disqus for Balitang San Pablo : Online