March 13, 2009

MGA PAGSUSURING MEDIKAL, HANDOG NI IVY

Sa nakaraang People’s Day ni Congreswoman Ma.Evita R. Arago na ginanap sa Villa Evanzueda sa Barangay San Ignacio, kanyang ibinalita na kaugnay ng pagdiriwang sa Buwan ng Marso bilang National Women’s Month, ang kanyang tanggapan ay magtataguyod ng Pap Smear and Breast Examination sa darating na Martes, Marso 24, sa Siesta Residencia de Arago sa Green Valley Subdivision simula sa ika-8:00 nh umaga hanggang ika-3:00 ng hapon. Ito ay sa kapakinabangan ng mga may gulang ng kababaihan, lalo na ang mga ina ng tahanan.


Nilinaw ng kongresista na ang pagsasagawa ng pagsusuri ay hindi gratis o walang bayad, lamang, ang magpapasuri ay walang magugugol, sapagka’t sasaguting bayaran ng kanyang tanggapan ang lahat ng magugugol sa bawa’t pagsusuri.


Sa kapakinabangan naman ng mga pinunong barangay sa sakop ng 3rd Congressional District, ang Tanggapan ni Kongresista Ivy Arago ay magtataguyod din ng walang babayarang General Executive Check-Up sa darating na ika-13 hanggang ika-17, at ika-23 hanggang ika-24 ng Abril na gaganapin sa Villa Evanzueda sa Barangay San Ignacio. Sa dahilang ang paglilingkod ay para sa lahat ng barangay officials sa distrito na binubuo ng isang lunsod at anim na munisipyo o nahahati sa 216 barangay, ay hinihiling lamang na hintayin ang paanyayang ipaaabot ng kanyang tanggapan para sa bawa’t barangay upang ang lahat ay maisagawang may kaayusan at kapakipakinabang para sa lahat.


Upang ang lahat ay magabayan, sa panapanahon ay maaaring tumawag para magtanong sa kanyang field office dito sa Lunsod ng San Pablo na ang telepono ay (049) 801-3109, at cellphone 0919-358 5866 at hanapin lamang si G. Fermin Sikat na siyang pinagtitiwalaan sa ikaaayos ng koordinasyon sa implementasyon ng mga palatuntunan. (Ruben E. Taningco)

ANNUAL SURVEY OF PHILIPPINE BUSINESS AND INDUSTRY ISASAGAWA NGAYONG ABRIL 2009

Ag National Statistics Office (NSO) ay abala ngayon sa paghahanda ng paglikom ng datos na naaukol sa kalakalan ng bansa na tinatawag na Annual Survey of Philippine Business and Industry (ASPBI). Sisimulan ang pamamahagi ng questionnaires sa Abril 1, 2009 sang-ayon kay Provincial Statistics Officer Magdalena T. Serqueña.


Ipinauunawa ni Bb. Serqueña na ang ASPBI ay naglalayon na makakuha at makaipon ng impormasyon buhat sa gawaing pangkabuhayan ng bansa na sumasaklaw sa taong 2008. Ang tama at napapanahong impormasyon ng negosyo ay magsisilbing batayan ng pamahalaan at pribadong sektor upang masuri ang estraktura ng industriya at mataya ang kalagayan ng kalakalan; makapagsagawa ng epektibong plano at matatag na desisyon para sa kalakalan at makapagbalangkas at makapag-monitor ng mga polisiya tungo sa pagkakamit ng katatagan sa gawaing pangkabuhayan.


Karagdagan sa ASPBI ay ang 2008 Survey on Information and Communication Technology (SICT). Ito ay gagawin upang makalikom ng detalyadong impormasyon sa pagkakaroon, pagmamahagi at paggamit ng teknolohiya sa impormasyon at komunikasyon ng mga kalakalan at industriya sa bansa.


Ayon pa rin kay Serqueña, dapat ay seryoso ang gagawaing pagsagot ng mga respondent sa kanilang mga questionnaires dahil sa ang datos ng ASPBI ay ginagamit ng National Statistical Coordination Board para sa pagtataya ng National Accounts. Ginagamit din ito ng mga research institutions at panlabas na samahan tulad ng United Nations Industrial Development Organization, World Bank, International Labor Organization, Asian Development Bank, negosyante at mag-aaral sa pagsusuri ng kalakalan ng bansa.


Pangungunahan ni Provincial Statistics Officer Magdalena T. Serqueña ang pagsasanay sa mga tauhan ng NSO-Laguna upang maging maayos at mabilis na maipamahagi at maibalik ang questionnaires ng ASPBI at SICT sa mga piling establisemento sa buong lalawigan ng Laguna. Walong punong-bayan sa Laguna kung saan maraming bahay-kalakalan ang hiningan ng tulong ni PSO Serqueña para sa pagpapalaganap ng impormasyon na nauukol dito tulad nina Mayor Vicente B. Amante ng San Pablo City, Mayor Joaquin M. Chipeco, Jr. ng Calamba City, Mayor Arlene A. Nazareno ng City of Santa Rosa, Mayor Isidro L. Hemedes ng Cabuyao, Mayor Marlyn A. Naguiat ng Biñan, Mayor Calixto R. Cataquiz ng San Pedro, Mayor Ariel T. Magcalas ng Sta. Cruz at Mayor Caesar P. Perez ng Los Baños. Makikipag-ugnayan na rin ang mga tauhan ng NSO-Laguna sa mga administrador ng economic zones o industrial parks para sa kanilang pag-sang-ayon na makapasok sa mga establisemento na kanilang nasasakupan. (NSO-Laguna)

RC CALAMBA ON CHIEF OF POLICE CHRISTOPHER TUMBUNGAN


Club President Ronnie de la Cruz presented a certificate of appreciation to the Chief of Police of Calamba City Police Station, P/Supt. Christopher Tambungan, for being their principal guest and main speaker during the recent weekly meeting of the Rotary Club of Calamba held at the Hope Intervention Library in Barangay Halang The meeting was also attended by the club-sponsored Rotaractors, being their true "partners in service" and key members of the family of Rotary. (Chris Sanji)

MISS PHILHEALTH AREA II


Si Bb. Ava Carag, isang Member Services Officer I na nakatalaga sa PhilHealth Region IV-B na naka-base sa Batangas City ang tinanghal na Miss Philhealth Area II sa katatapos na Work-Life Balance Program na ginanap sa Tagaytay Country Hotel sa Tagaytay City kamakailan, kaugnay ng kanilang paggunita sa ika-14 Anibersaryo ng pagkakatag ng Philippine Health Insurance Corporation.


Ang Area II ay binubuo ng mga rehiyon sa Katimugang Luzon at Visayas sa ilalim ng pamamatnubay ni First Vice President Gregorio Rolluda, kaya masasabing si Bb. Carag ay nangibabaw sa lima pang kandidata. Napagwagian din niya ang karangalang Best in Sportswear, at Best in Talent, at isa sa dalawang kinilalang Miss Congeniality.


Napag-alaman na ang Region IV-B na pinangangasiwaan ni Assistant Vice President Paolo Johann C. Perez ang nagtamo ng pinakamaraming karangalan kaya sa kabuan ay natamo ng rehiyon ang grand prize ng P20,000-cash. (Ruben E. Taningco)

Heneral Tristan M. Kison, Nalipat sa 9th Infantry Division


Matapos tanggapin ang kanyang estrella at matalagang Assistant Division Commander ng 9th Infantry Division na ang lawak ng pananagutan ay Bicol Region, ay inilipat ni Brigadier General Tristan Mendoza Kison ang pagiging commander ng 202nd Infantry Brigade kay Koronel Virgilio M. Espeneli (DSC) sa turn-over ceremonies na ginanap sa brigade headquarters sa Barangay Antipolo, Rizal noong Lunes ng tanghali na pinangasiwaan ni Major General Roland Detabali, Commanding General ng 2nd Infantry Division ng Philippine Army na may punong himpilan sa Camp Mateo Capinpin sa Tanay, Rizal.


Napag-alaman mula kay 1Lt. Celeste Frank L. Sayson ng Public Information Office ng 2nd Infantry Division na si Col. Virgilio M. Espeneli ay dating Batallion Commander ng 1st Infantry Batallion sa Laguna, bago natalagang Chief of Staffs and Commander of Task Force Bantay sa headquarters ng Philippine Army, bago nahirang para pamunuan ang 202nd Infantry Brigade na dati na rin niyang kinatatalagahan.


Ang 202nd Infantry (Unifier) Brigade ay binubuo ng 1st Infantry Batallion na pinamumunuan ni Lt. Col. Ernest Marc P. Rosal na ang lawak ng pananagutan ay Laguna; ng 16th Infantry Batallion na pinangungunahan ni Lt. Col. Jaime A. Abawag na ang lawak ng pananagutan ay Lalawigan ng Rizal; at ng 740th Combat Group na pinangungunahan ni Major Ariel I. Villareal, at 730th Combat Group na pinangungunahan ni Major Carlo C. Orcino, kapuwa ng Philippine Air Force at nakahimpil sa Fernando Air Base sa Batangas.


Maiiwang alaala ni Brigadier General Tristan Mendoza Kison na noong mga panahong siya ay commander ng 1at Infantry Batallion, hanggang sa siya ay paglipatan ng pananagutan ni Brigadier General Jorge Valbuena. Segovia bilang commander ng 202nd Infantry Brigade ay ang kanyang aktibong pakikilahok sa mga pagpupulong ng Provincial Peace and Order Council sa Santa Cruz, at ng City Peace and Order Council sa San Pablo City upang patuluyang madama ang kahandaan ng Philippine Army sa pagtugon sa mga tawag na pangkagipitan kung may nagaganap na kalamidad sa lalawigan. (Ruben E. Taningco)

PREQUALIFIED CONTRACTOR, MAPAGTITIWALAAN

Si District Engineer Federico L. Concepcion ay personal na tinitiyak na ang mga kontratista na may proyekto sa sakop ng kanyang sub-district ay ginagamit ang mga kagamitang nakasaad sa kanilang Contractor’s Prequalification Statement.”



Kung napapansin na sa mga government project ay mga pamilyar na pangalan ng mga kontratista ang nakalagay sa taurpulin o billboard na gumagawa nito, ito ay hindi nangangahulugan na may paboritong kontratista ang DPWH, kundi nangangahulugan lamang na ang pangasiwaan ng DPWH sa isang engineering district ay umaalinsunod sa itinatagubilin ng Republic Act No. 9184 o Government Procurement Act na pinagtibay noon pang Enero ng 2003 na nagpapahayag ng mga layunin upang mapalaganap ang kamalayan sa marapat at mabuting pangangalaga sa salapi ng bayan ng lahat ng sangay, ahensya, kagawaran, at subdibisyon ng pamahalaan, kasama na ang mga korporasyon na kontrolado ng pamahalaan sang-ayon kay Kongresista Edgar S. San Luis ng Ika-4 Distrito ng Laguna. Ang nabanggit na batas ay gagawang maging ang karaniwang mamamayan ay masubaybayan ang nagiging kayarian ng paggawain, magpapasigla sa malayang pangangalakal, at magkakaroon ng iisang paAwardmantayan sa pamimili ng kagamitan ng pamahalaan, at matutukoy ang mga may pananagutan, na magbubunga ng katipiran sa mga gugulin ng pamahalaan.


Nabanggit ni District Engineer Federico L. Concepcion ng DPWH-Laguna Sub-District Engineering Office na naka-base sa Barangay Del Remedio sa San Pablo City, na simula nang ipatupad ang Government Reformed Procurement Act noong unang buwan ng Taong 2004, ay inalis na ang kilala noong Prequalifications, Bids and Awards Committee (PBAC) na ang tagapangulo ay gobernador at alkalde, at ang ipinalit ay Bids and Awards Committee (BAC) na binubuo ng mga career official.


Sa mga pasubasta na ipinatatawag ng Bids and Awards Committee, ay tanging mga pre-qualified contractor ang maaaring lumahok, kaya nagiging kapansinpansin na ilang pangalan ng kontratista ang nagwawagi sa bidding, batay sa uri o kategorya ng paggawain.


Sa implementasyon ng public works, tulad ng pagsasaayos ng kalsada, at pagtatayo ng mga school buildings, Ang kinikilalang prequalified contractor ay yaong mga kontratista na pinagkalooban ng Department of Public Works and Highway (DPWH) ng “Certificate of Qualifications” matapos na makapaglahad ng Contractor’s Prequalification Statements batay sa kategorya ng proyektong ninanasa nilang lahukan, tulad ng pagpapahayag sa kanilang puhunan, mga kasangguning propesyonal, mga pag-aaring heavy equipments, at kasaysayan ng kontratista na makakapagpakita sa kakayanan nitong maipatupad ang proyekto.


Sa obserbasyon ni District Engineer Federico L. Concepcion, simula ng mapagtibay ang Implementing Rules and Regulations (IRR) para sa Reformed Procuement Law, ay naiwasan na ang paglahok ng mga kontratistang walang sapat na puhunan na inaabandana ang paggawain, o ipinagbibili ang kontrata sa mga kontratistang walang pinanalunang kontrata.


Dahil sa ang mga prequalified contractor ay nakatutugon sa kinakailangang katangian ng kontratista, pinatutunayan ng karanasan sa mga engineering district dito sa Laguna na wala na ang mga kontratistang matapos magwagi sa pasubasta ay ibinibenta ang kontrata sa iba, o mga kontratistang inaabandona ang kanilang kontrata dahil sa wala na silang magugol sa pagrenta ng kagamitan at pasahod sa mga manggagawa. Ang mga kontratista ngayon ay nakasusunod na sa tinatawag na Project Evaluation Review Technique/Critical Path Method (PERT/CPM) sa paghahanda ng mga pang-araw-araw na gawain sa nalolooban ng itinatakdang panahon sa kontrata, at natatapos ang proyekto sa takdang araw. (Ruben E. Taningco)

Sign Up Now!!!!

Sign up for PayPal and start accepting credit card payments instantly.

Disqus for Balitang San Pablo : Online