July 25, 2007

JOBS FAIR PARA SA LOCAL AND FOREIGN PLACEMENTS

SAN PABLO CITY - Sa pakikipag-ugnayan sa Department of Labor and Employment (DOLE)-Region IV-A, pag-alinsunod sa palatuntunang panglipunan ni Mayor Vicente B. Amante, ang Public Employment Services Office (PESO) sa lunsod na ito ay magtataguyod ng Jobs Fair for Local and Abroad sa darating na Biyernes, Agosto 24, 2007, simula sa ika-8:00 hanggang ika-4:00 ng hapon, sa Multi-Purpose Covered Court (PAMANA Hall) sa City Hall Complex.

Sang-ayon kay City Administrator and concurrent PESO Manager Loreto S. Amante, ang katangian ng mga dapat lumahok sa jobs fair ay may gulang na mula sa 18 taon pataas, at nakapagtapos ng pag-aaral sa kolehiyo, subali’t ang mga nasa junior year na sa kolehiyo ay maaari na ring isaalang-alang. Makabubuti ring magdala sila ng mga sumusunod: bio-data o personal resume na may kalakip na larawang may sukat na 2” x 2”, birth certificate na kaloob ng Local Civil Registrar na pinatutunayan ng National Statistic Office’ at NBI Clearance na kinakailanagan sa local and foreign placements. Kung Gawain sa labas ng bansa ang hinahangad ay dalahin na rin ang kanilang valid passport.

Para sa karagdagang kabatiran, makabubuting makipag-ugnayan sa PESO Office na nasa 3rd Floor ng 8-torey Building, at hanapin lamang sina Bb. Linda C. Gonzaga at Lalaine Caliwagan. Ang kanilang telepono ay (049) 800-2953 at 562-3086. (CIO/p. d. bigueras)

PAGPAPATALA NG BUSINESS NAME, PUEDE SA SPCCCII

ALAMINOS, Laguna - Sa mga nagbabalak na magpatala ng business name, na kinakailangan para sa pagtubos ng business permit and license o lisensya sa pagbubukas ng negosyo, kung alanganing magsadya sa Department of Trade and Industry- Provincial Office na nasa kahabaan ng National Road sa Barangay Banca-banca sa Victoria, ay maaaring maglahad ng kanilang application form sa tanggapan ng San Pablo City Chamber of Commerce and Industry, Inc (SPCCCII). na nasa 2nd Floor ng Old City Hall Building sa San Pablo City, na may telepono bilang (049) 561-2880.

Ang SPC Chamber of Commerce and Industry ay deputized ng DTI para tumanggap ng mga kahilingan para sa pagpapatala ng business name, at marami sa mga potential investor sa lalawigan ang dito nagsasadya para sa pagpaparehistro ng kanilang proposed business names.
Ang dapat dalahin ay dalawang (2) kopya ng litratong may sukat na 2” x 2”, at maghanda na ng tatlong binabalak na maging katawagan sa itatayong negosyo o proposed business name, payo ni Local Treasury Operations Officer Juanita B. Rivera ng Tanggapan ng Tesorero rito. Ang kabuuang bayarin ay P450.00. (RET)

ANG SSS AY 50 TAON NA

SAN PABLO CITY - Sa isang bansang katulad ng Pilipinas kung saan ang mga manggagawa ay kumikita ng halos ay hindi makasapat para sa kanilang mga pangunahing pangangailangan, ay may pangangailangan na sila ay mapagkalooban ng mapagtitiwalaang palatuntunang pangkapanatagang panglipunan, sapagka’t panangutan ng pamahalaan na magkaloob ng katarungang panglipunan sa mga mamamayan. Ang pagbibigay ng katiyakang maipagkakaloob ang makabuluhang tulong na pinansyal sa tamang panahon at pagkakataon sa nangangailangang manggagawa ang sandigan o batayan sa pagkapagtatag ng Social Security System (SSS) may limampong (50) taon na ang nakalilipas, sang-ayon kay Assistant Vice President Aida V. delos Santos ng South Luzon Cluster, na ang punong tanggapan ay nasa lunsod na ito.

Ang Social Security System (SSS) ay natatag noong Setyembre 1, 1957, at maraming taga-Lunsod ng San Pablo ang nakagugunita na laging sinasabi sinabi ni Atty. Mauricio Rivera na dating hepe ng regional office ng SSS na naka-base na rin dito sa Lunsod ng San Pablo, sa pakikipanayam ng Radyo DZSP, na ang palatuntunan ay isa sa mga nasa kaisipan ng Pangulong Ramon F. Magsaysay, ang namayapang Pangulo ng Bansa na kinilalang napakalapit sa masa, at nadarama ang pangangailangan ng mga mahihirap na manggagawa.

Ayon pa kay AVP delos Santos, ang mga miyembro ng SSS na nakakabayad ng kanilang pananagutan sa sistema, kasama ang kagawad ng kanilang pamilya, ay may karapatan sa mga biyayang kaloob ng SSS kung sila ay abutin ng pamamahinga o magretiro, o bagama’t bata pa ay naging paralatiko dahil sa aksidente o nagkasakit na may kaugnayan sa kanilang gawain, ay tatanggap sila ng tulong na pinansyal. Ang mga miyembro ay maaari ring magtamo ng tulong na pinansyal kung nagkakasakit, o kung nanganganak. Sa pakikipag-ugnayan sa ibang institusyon ng pamahalaan, ang SSS ay nakatutulong din sa mga kawaning nagnanais na makapagtayo ng sariling tahanan o makapagtayo ng sariling negosyo. Maging ang mga Overseas Filipino Workers ay may palatuntunang nakalaan para sila ay matulungan kahit sa panahon na ng kanilang katandaan at pamamahinga. (Ben Taningco)

Sign Up Now!!!!

Sign up for PayPal and start accepting credit card payments instantly.

Disqus for Balitang San Pablo : Online