June 26, 2008

REPLICA NG BARIL, MATAGAL NG BAWAL SA SAN PABLO

Sa kasalukuyan, ang dalawang kapulungan ng Kongreso ay kumikilos upang masugpo ang paglaganap ng mga hindi lisensyadong baril, at ng mga laruang baril na ang kayarian ay katulad o kawangis ng mga tunay na baril sang-ayon sa ulat na inilathala ng Manila Standard Today noong Miyerkoles ng umaga.

Muli ang Senado ay nagpatibay ng isang panukalang batas na maglalapat ng higit na mabigat na parusa sa mga mararapatang nag-iingat ng walang lisensyang baril, at mga magsisipagbenta ng baril, bala, at paputok. Ang Malaking Kapulungan naman ay muling nagpaalaala sa Department of Trade and Industry, Department of the Interior and Local Government, at Department of Finance upang masugpo ang pagpasok ng mga replica ng baril, lalo na yaong nakakatulad ng assault weapon. Ito umano ay upang masugpo ang mga krimeng ang nagsasagawa ay pawang nagsisipagtaglay ng baril, na maaaring dahil sa takot, ay hindi napapansin ng mga biktima na ang ginamit na pantakot ay laruan lamang.

Nagugunita nina dating Punong Barangay Macario P. Almario ng Barangay San Pedro, at Punong Barangay Conrado L. Samsaman ng San Joaquin, na noong pang Pebrero ng Taong 2002 napagtibay sa mungkahi at pagtataguyod ni ABC President Gener B. Amante ng Sangguniang Panglunsod ang isang kautusang nagbabawal ng paggawa, pag-iingat, pamamahagi, pagbibili o pangangalakal ng mga laruang baril na kawangis ng mga tunay na baril, lalo na yaong may mga sangkap na gawa sa metal.

May mga natipong ulat si Konsehal Amante na may mga paltik na kalibre .22 na di-umano ay ginamit sa ilang patayang naganap dito sa mga Lalawigan ng Laguna at Quezon na yari mula sa laruang baril na kawangis ng rebolber na may tubong yari sa metal.

Ang nabanggit na Gener Amante authored ordinance ang batayan ni City Administrator Loreto S. Amante upang tuwing sasapit ang buwan ng Hulyo ay magsagawa ng information education campaign upang paalalahanan ang mga negosyante sa lunsod na huwag isasama ang mga laruang baril sa kanilang binabalak itinda sa pagsapit ng panahon ng kapaskuhan, sapagka’t may kapangyarihan ang kapulisan, at ang mga tauhan ng Department of Trade and Industry na ito ay kumpiskahin. (Ben Taningco)





SAKIT NA PULMUNIYA O MENINGETIS

P O P T A L K . . . . .

Ni Ruben E. Taningco

Sa mga ulat na sa panapanahon ay ipinalalabas ng World Health Organization (WHO), ay karaniwang binabanggit na tauntaon ay umaabot sa 1.6-milyon ang bilang ng mga batang wala pang limang (5) taong gulang ang namamatay dahil sa pneumococcal disease (PD) o ang kilala rito sa Pilipinas na pulmoniya o kung ang ulo ang sumasakit ay meningitis.

Ang pulmoniya ay bunga ng pagkakaroon ng koloniya isang uri ng bacteria na kinikilalang Streptococcus pneumoniae o pneumococcus sa daanan ng hininga na lubhang nakakaapekto sa kalalagayan ng baga na nagiging sanhi ng kamatayan. Ito ay naihahawa o naililipat sa mga nakakatabing sambahay o kasamahan sa isang lugar sa pamamagitan ng pagbahin, pag-ubo o lubhang malapitang pagtatabi, na bagama’t ito ay kinikilalang isa sa pangunahing sakit sa mundo na nagiging sanhi ng kamatayan, lalo na sa mga batang wala pang limang (5) taong gulang, dito sa Asia Pacific Region ay hindi pa nababatid na ito ay madaling maiiwasan sa pamamagitan ng isang uri ng bakuna, ang pneumococcal conjugate vaccine na nagbibigay ng proteksyon laban sa pito (7) sa mga pangunahing sakit na pinagtutuunan ng pansin ng nabanggit na nalikhang bakuna. Sa North America, Oceania, Europe at Middle East ay malawakan na itong ipinagkakaloob sa mga bata at kapansinpansin ang pagiging ligtas ng mga bata

Sa isang Science Writers’ Seminar na ipinag-anyaya ng Geiser Maclang Marketing Communications, Inc. na ginanap sa Maynila, nabanggit ni Dr. Jaime A. Santos, Chairman of the Department of Microbiology and Section of Parasitology sa OLFA’s College of Medicine, dito sa Pilipinas, nagging kapansinpansin ang pagiging epektibo sa mga bata ng pneumococcal conjugate vaccine, na tinatawag ng mga manggagamot na “PCV7 (Prevenar)”. Gayon pa man, nabanggit ng kilalang manggagamot na ito ay may kamahalan kaya hindi pa ito makayanan ng pamahalaan na mipagkaloob ng walang bayad. Katunayan nito, may ulat ang Department of Health, na sa mga bansang kaanib ng Association of Southeast Asian Nations (ASEAN), ay walang local government unit (LGU) na may palatuntunan ng pagkakaloob ng walang bayad na PCV7 (Prevenar) liban sa Lunsod ng Pasig sa Metro Manila na sinimulan nila nitong taong kasalukuyan, at tila iilan pa ang pediatrician o manggagamot na ang konsentrasyon ng panggagamot ay sa mga sanggol at bata, na may kasanayan sa pagkakaloob nito.

Dito sa San Pablo City, tulad din sa Angeles, Baguio, at Metro Manila, ang halaga ng pagpapaturok ng PCV7 (Prevenar) ay mula sa P4,500 hanggang P5,500 bawa’t pasyente, kaya may mungkahi ang ilang punong barangay sa Alaminos na sana ay pagtutunan ng pansin ng mga mambabatas ang mga pamamaraan para ang PCV7 (Prevenar) ay maipagkaloob ng pamahalaan na walang bayad.



MGA GAMPANIN NG BARANGAY SECRETARY

ALAMINOS, Laguna – Bilang tagapayo ng Liga ng mga Barangay, nagpapaalaala si Mayor Eladio M. Magampon MD sa lahat ng mga kalihim ng barangay o barangay secretary sa bayang ito na kanilang alalahanin ang itinatagubilin sa Seksyon 394 ng Local Government Code of 1991 o Batas Republika Bilang 7160 na sila ay may pananagutang maghanda ng maayos na talaan ng lahat ng kasapi ng barangay assembly, na ang nabanggit na talaan ay dapat may mga siping nakapaskel sa ilang hayag na lugar sa barangay; at kinakailangang maghanda at mag-ingat ng maayos na record ng lahat ng resident eng barangay na nalagay ang sumusunod na impormasyon: pangalan, tirahan, dako at petsa ng kapanganakan, kasarian, kalalagayan sa buhay, pagkamamamayan, gawain o hanapbuhay, at iba pang datus na makatutulong sa ganap na ikakikilala sa isang residente.


Ang barangay secretary ay dapat ding may maayos na pakikipag-ugnayan sa Local Civil Registrar para sa pagpapatala ng mga ipinanganganak, namamatay, at nag-aasawa sa barangay.


Lubhang mahalaga ang mga record na ito ayon kay Dr. Magampon dahil sa ito ang pinakapangunahing pangangailangan bilang reperensya o batayan ng ano mang gawain sa barangay, mula sa pagbalangkas at implementasyon ng mga palatuntunang pangkalusugan, paghahanda ng palatuntunan sa pagpapaunlad ng paaralan, sa paghahanda ng mga palatuntunan ng barangay disaster coordinating council, at maging sa mga palatuntunang may kaugnayan sa suliranin ng kapayapaan, kaayusan at kapanatagan.


Ang mga records na ito rin ang pangunahing batayan sa pagpapatawag ng community assembly na dapat isagawa dalawang beses isang taon para pagpasiyahan ang mga palatuntunang pangkaunlarang inihanda ng barangay development council na pinagtibay ng sangguniang barangay, at gayon din para pagtibayin ang proposed annual barangay budget na inihahanda ng sangguniang barangay, paalaala pa ng punumbayan (
RET)

SUSI NG BAHAY, IPINAMAHAGI

CITY OF SANTA ROSA– Sinimulan na ng Local Inter-Agency Committee ang pamamahagi ng mga susi sa mga housing units para sa mga benepisyaryo ng pabahay kaugnay ng South Rail Project.

Ang Local Inter-Agency Committee (LIAC) ay itinayo upang pangasiwaan ang paglipat ng mga taga-riles sa Southville 4, ang housing project na nakalaan sa mga pamilyang apektado ng pagpapalawak ng mga daang bakal sa ilalim ng South Rail Project ng pambansang pamahalaan.

Ang LIAC ay binubuo ng mga opisina ng lokal na pamahalaan ng Lungsod ng Santa Rosa, at mga pambansang ahensya tulad ng National Housing Authority (NHA), Philippine National Railways (PNR), Housing and Urban Development Coordinating Council (HUDCC), Philippine Commission for the Urban Poor (PCUP), at Commission on Human Rights (CHR). Sinisiguro ng Committee na mahusay ang pasibilidad ng pabahay at maayos na makalipat ang mga benepisyaryo.

Isinagawa ang serye ng pamamahagi ng mga susi para sa mga pamilyang nabiyayaan ng programang pabahay noong nakaraang buwan at hanggang sa kasalukuyan. Batay sa tala ng City Urban Housing and Development Office (CUDHO), mayroon ng 1,033 pamilya ang nabigyan ng susi nitong Mayo. Ang mga ito ay maaari nang lumipat sa kanilang bagong tirahan sa Southville 4, ang 18 ektaryang relocation site na matatagpuan sa Brgy. Caingin.

Kumpleto sa pasilidad ang Southville 4 gaya ng tubig, kuryente at kongkretong kalsada. Bukod dito ay naroroon din ang tanggapan ng NHA at Goldenville Realty Development Corporation (GRDC) upang tugunan ang ilan nilang mga katanungan at mga suliranin kaugnay sa kanilang bahay. Sisimulan na rin ang pagtatayo ng paaralan at maliit na palengke. Samantala, ilang housing units ang inilaan bilang pansamantalang klasrum habang di pa natatapos ang school building.

Ayon sa pamahalaang lungsod, hindi dito nagtatapos ang programa ng pamahalaan. Maglalaan din si Mayor Arlene Arcillas-Nazareno ng Daycare Center at programang pangkabuhayan para sa mga pamilyang naninirahan dito.

Nagpaabot din ng pasasalamat sa pamahalaan ang mga nabiyayaan ng programang pabahay sa pamahalaan, dahil sa wakas ang pangarap nilang disenteng tirahan ay natupad na. Ngayon ay makakaahon na sila sa paninirahan nila sa tabing riles. (CIO-Santa Rosa City)

BATANG PABLO’Y, UMANI NG GINTO SA VIETNAM


Si Carl Angelo D. Perez, kaisa-isang anak ng mag-asawang Millian A. Perez at dating Frances Melecia Dizon ng Barangay San Roque, San Pablo City, ay umani ng medalyang ginto ng siya ay lumahok sa 9th ASEAN Age-Group Chess Championship na ginanap sa Danang City, isang coastal city sa Vietnam, noong nakaraang Hunyo 9 – 18, 2008. Siya ay kagawad ng three-man Philippine Team para sa Under 12 Year Old Category.Ang kanyang team-mate ay sina John Ray Butucan ng Davao City, at Vince Angelo Medina ng Bacoor, Cavite, at ang kanilang coach ay si International Master Idelfonzo Datu.

Sang-ayon kay dating Kongresista Prospero Petchay, pangulo ng National Chess Federation of the Philippines, ang napagwagian ng Philippine Team sa Under 12 Category ay gold medal ng tanghalin silang kampyon sa standard chess competition matapos talunin ang national team ng Vietnam, at bronze medal sa blitz chess competition (Five Minutes Game) ng sila ay maging third placer sa labanang nilahukan ng sampong (10) national team.

Sang-ayon kay City Administrator Loreto S. Amben na bilang isang Foreign Service Student ay nakapagsagawa ng On-the-Job Training sa Secretariat ng ASEAN na naka-base sa Jakarta, Indonesia, ang Association of Southeast Asian Nations sa kasalukuyan ay binubuo ng sampong (10) bansa, na gaya ng mga sumusunod: Indonesia, Malaysia, Pilipinas, Singapore, Thailand, Brunei Darussalam, Vietnam, Lao PDR, Myanmar, at Cambodia.

Layunin ng ASEAN na mapasigla ang paglago ng kabuhayan, kaunlarang panglipunan, at pagpapaunlad sa kulturang likas sa magkakalapit na mga bansa sa rehiyon.(RET)

Government Subsidy in Meralco Bill


Personal na pinangunahan ni Land Bank Department Manager Evelyn L. Malapaya (nakasalaming nakaupo sa dulong kanan) ang pagbabayad sa mga MERALCO Subscriber sa San Pablo City at mga Bayan ng Alaminos, Calauan, Rizal, at Nagcarlan sa Laguna, at Dolores at Tiaong sa Quezon na ang konsumo ay hindi humihigit sa 100 kilowatt ng subsidy na sinubaybayan at pinangalagaan nina City Administrator Loreto S. Amantte at Police Inspector Rolando A. Libed sa One Stoip Processing Center na ipinagpapasalamat ng mga apektadong mamamayan. (7LPC Photo Release).

PAMAMAHAGI NG ABONO, TINALAKAY NI DIRECTOR BRAGAS

Si Regional Executive Director Abelardo Bragas ng Department of Agriculture-Region 4-A ay nagpatawag ng komperensya ng mga provivincial and city agriculturist sa kanilang punongtanggapan sa Quezon City noong Lunes upang maipaunawa ang mekanismo ng pamamahagi ng abono bilang pag-alinsunod sa Fertilizer Subsidy Program na isinusulong ni Agriculture Secretary Arthur Yap sa tagubilin ni Pangulong Gloria Macapagal Arroyo upang masigla ang produksyon o maitaas ang ani ng palay sa mga palayan sa CALABARZON.

Batay sa timetable ni Bragas, ang abono ay dapat maipamahagi bago nmatapos ang buwan ng Oktubre, na siyang panahon na kinakailangang ang mga palayan sa rehiyon ay dapat lagyan ng abono sa ikatitiyak ng katatagan ng imbentaryo ng panustos na butil sa Katimugang Tagalog. (RET)

KONSULTASYON SA MGA LIDER NG BARANGAY


Ang mga bumubuo ng Liga ng mga Barangay sa Alaminos, sa pangunguna nina Mayor Eladio M. Magampon at ABC President Oscar Masa ay dumalaw noong isang tanghali kay Congresswoman Ma. Evita R. Arago sa Sityo Balok upang mapagtalakayan ang mga tulong na naipagkaloob na ng mambabatas sa kabuuan ng munisipyo, at ang mga ispisipikong suliranin na dapat pang solusyonan bago matapos ang taong kasalukuyan para sa kagalingan ng mga mamayan na tila ngayon lamang makatotohanang napagtutuunang tulungan ng pamahalaang pambasa. (7LPC Photo)

PHILIPPINE ARMY, NAGBIBIGAY-DAAN SA KAUNLARAN


Nang si Koronel Tristan Mendoza Kison, ang bagong talagang commanding officer ng 202nd Infantry Brigade na may punong himpilan sa Barangay Antipolo, Rizal, Laguna, ay hilingan ni Mayor Vicente B. Amante na magbigay ng maikling pangungusap sa flag ceremony sa City Hall noong nakaraang Lunes ng umaga, kanyang binanggit na ang pangunahing misyon sa kasalukuyan ng Philippine Army dito sa CALABARZON Area ay hindi ang komprontahin ang mga armadong kilusan na kumikilos dito sa mga Lalawigan ng Laguna at Quezon, kundi upang mapangasiwaan ang pagkakaroon ng isang kalalagayang magbibigay daan upang maipatupad ng pamahalaan ang mga palatuntunang pangkaunlaran para sa kagalingan ng mga mamamayan.

Halimbawa, sa dako ng Infanta at Real sa Quezon ay upang maging panatag ang mga kontratistang nagpapaunlad ng seksyon ng pambansang lansangan doon, sa mga bayang bumubuo ng 4th Congressional District ng Laguna ay ang pagpapaunlad ng mga farm-to-market road upang maging magaan ang pagdadala ng mga ani sa mga kanalyunan sa pamilihan, at may mga lugar na ang kanilang ginagampanan ay ang pag-uugnay-ugnay ng paghahatid ng mga paglilingkod na pangkalusugan sa mga liblib na pamayanan. Ang Philippine Army ay aktibo rin sa implementasyon ng mga palatuntunang magpapaunlad sa kapaligiran, tulad ng reforestation program, and environmental sanitation.

Ang 202nd Infantry Brigade ay mayroon mga oprganisadong grupo na may kakayanang maghatid mga pangkagipitang tulong, tulad ng mga rescue operations sakali’t may mga kalamidad na nagaganap sa sakop ng lawak ng kanilang pananagutan.

Hindi nakaligtaang banggitin ni Koronel Kison ang kanyang pananaw sa One Stop Processing Center na ipinatayo ni Alkalde Vicente B. Amante, kung matatamo ang kabuuang paglilingkod sa isang nangangailangang mamamayan, o pakikipag-ugnayan o transaksyon sa pangasiwaang local, ito ay kasingkahulugan na ang pangasiwaang lunsod ay kabalikat ng pambansang liderato sa pagpapatatag ng bansa. (RET)

IVY-ELADIO Taniman Para Sa Kalusugan

ALAMINOS, Laguna – Sa dahilang ang pangunahing suliranin sa kasalukuyan sa bayang ito ay ang kahirapan, sa pagdiriwang ng ika-110 anibersaryo ng pagkapagpahayag ng kalayaan ng bansa, ipinahayag ni Mayor Eladio M. Magampon na binibigyang-sigla ng pangasiwaang lokal ang Palatuntunang Taniman sa Barangay na pinaglaanan ng pondong P1-milyon ni Congresswoman Ma. Evita R. Arago para pagkunan ng ipagkakaloob na cash prizes sa mga magsisipagwaging kalahok na barangay, organisasyon ng magsasaka, at indibidwal na magtatanim. Ang kakailanganing pondo para sa pagbili ng binhi ng 15 uri ng gulay na itatanim ay inilaan ng pangasiwaang lokal. Ito ay taniman para sa kalusugan.

Ayon kay Municipal Agriculturist Gladys de Villa Apostol, ang IVY-ELADIO ay acronym para sa “In View of the Youth, and Enhance Local Agricultural Designs with Integrated Opportunities” na ipatutupad na may pakikipag-ugnayan sa FAITH Food Program ni Gobernadora Teresita S. Lazaro, at ang implementasyon ay tatagal hanggang sa huling araw ng darating na Buwan ng Setyembre. Dahilan sa mga pangunahing layunin ng palatuntuman, ito ay ipinatutupad bilang IVY-ELADIO Taniman para sa Kalusugan.”

Nauna na, si Gobernadora Teresita S. Lazaro ay nagpadala ng 32 yunit ng chemical sprayer para gamitin sa pagpuksa ng mga pesteng inaasahan maninira sa mga itatanim na gulay, sa pasubaling ang mga magsasaka ay gagamit lamang ang rekomendadong insecticide ng Department of Agriculture.

Sa ikasisigla ng IVY-ELADIO Food Enhancement Program, na isang kompetisyong pangmagkakaibigang mga magsasaka, ang barangay na mangunguna sa first and second evaluation ay pagkakalooban ng gantimpalang P50,000, at ang kikilalaning grand prize winner ay tatanggap ng P300,000-worth of barangay project; ang first runner-up ay pagkakalooban ng P200,000-worth of barangay project; at ang second runner-up ay magtatamo ng P100,000-worth of barangay project.

Ang magsisipagwagi sa Paligsahang Pinaka ay pagkakalooban ng cash prize na P1,000 bawa’t isa, at ang organisasyon ng magsasaka na magtatamo ng pakilala ang inilahok nilang proyekto ay magtatamo rin na cash prize na kaloob ng tanggapan ni Congresswoman Ivy Arago.

Sa kanyang talumpati sa palatuntunang ginanap sa paanan ng bantayog ni Dr. Jose P. Rizal, ipinaalaala ni Mayor Eladio M. Magampon na ang isa sa mahalagang bunga ng pagkapagpahayag ng kalayaan ng bansa, ay ang pag-iral ng gobyernong republikano na naninindigan sa pagkakaloob ng kalayaan sa pananampalataya at pamamahayag.

Gayon pa man, ipinapansin ni Mayor Magampon na ang bawa’t kalayaan ay may limitasyon, upang umiral ang disiplina, kaya hindi siya nagdaramdam na ang kanyang pangasiwaan ay punahin, lamang, sana ay gawain ang pagpuna ng may panangutan at salig sa umiiral na pagpapahalaga ng mga Pilipino. Sana, kung napapansin ang mga kamalian, ay pansinin din ang mga kapuripuring nagawa ng mga pinunong bayan.

Winakasan ni Dr. Magampon ang kanyang mensahe sa pagpapahayag na,. “Punahin ako kung ako ay nagkukulang, at ang mali ay ating itatama.” (RET)

Dr. Fernandez to head the Women Scientists in Fisheries


Dr. Dalisay de Guzman Fernandez, Chief Science Research Specialist and head of the Research Information Utilization Division of the Los Baños-based Philippine Council for Aquatic and Marine Research and Development (PCAMRD) of the Department of Science and Techonology was recently elected president of the National Network on Women in Fisheries in the Philippines, Inc. (WINFISH). She will take over from Retired Bureau of Fisheries and Aquatic Resources-Region VI Director Sonia V. Seville, and her term of office is two years. WINFISH was organized at the University of the Philippines in the Visayas in Year 2000 and its aims are to improve women;s quality of life especially in the fisheries-involved communities through advocacy and networking. Increase awareness of women’s role in fisheries, generate information exchange among members and interested individuals and institutions. Dr. Fernandez is a native San Pableña and past President of the San Pablo Colleges’s Alumni Association, Inc.(RET)

DANILO DEVANADERA, NANGUNA SA CHESS TOURNAMENT


WOOD PUSHER – Nang isulit ni Radio Operator Danilo Devanadera ng Barangay Radio Control Divison. kay G. Pedrito D. Bigueras ng City Information Office ang tropeong kanyang natamo bilang isa sa limang nangunang manlalaro sa ginanap na 2008 Laguna Non-Master Chess Championship Tournament na ginanap sa SM Sta. Rosa na itinaguyod ng Laguna Chess Association. Ang torneo ay nilahukan ng 49 chess player na kumakatawan sa mga lunsod at munisipyo na bumubuo ng lalawigan. (Sandy Belarmino)

Asia Pacific Conference of the Junior Chamber International


JCI San Pablo Seven Lakes delegates posed with the leaders of the Junior Chamber International that attended the 2008 Asia Pacific Conference held in Busan, Korea last May 28 to June 1. From left are JCI Member Loreto S. Amante, JCI Member Normandy I. Flores, JCI Executive Vice President Lori Tomlin of JCI-United States, JCI President Graham Honlon of JCI-Ireland, JCI Member Rafael R. dela Cruz, and JCI Member Jose A. Agoncillo.

June 24, 2008

SUSI NG BAHAY, IPINAMAHAGI

CITY OF SANTA ROSA– Sinimulan na ng Local Inter-Agency Committee ang pamamahagi ng mga susi sa mga housing units para sa mga benepisyaryo ng pabahay kaugnay ng South Rail Project.

Ang Local Inter-Agency Committee (LIAC) ay itinayo upang pangasiwaan ang paglipat ng mga taga-riles sa Southville 4, ang housing project na nakalaan sa mga pamilyang apektado ng pagpapalawak ng mga daang bakal sa ilalim ng South Rail Project ng pambansang pamahalaan.

Ang LIAC ay binubuo ng mga opisina ng lokal na pamahalaan ng Lungsod ng Santa Rosa, at mga pambansang ahensya tulad ng National Housing Authority (NHA), Philippine National Railways (PNR), Housing and Urban Development Coordinating Council (HUDCC), Philippine Commission for the Urban Poor (PCUP), at Commission on Human Rights (CHR). Sinisiguro ng Committee na mahusay ang pasibilidad ng pabahay at maayos na makalipat ang mga benepisyaryo.

Isinagawa ang serye ng pamamahagi ng mga susi para sa mga pamilyang nabiyayaan ng programang pabahay noong nakaraang buwan at hanggang sa kasalukuyan. Batay sa tala ng City Urban Housing and Development Office (CUDHO), mayroon ng 1,033 pamilya ang nabigyan ng susi nitong Mayo. Ang mga ito ay maaari nang lumipat sa kanilang bagong tirahan sa Southville 4, ang 18 ektaryang relocation site na matatagpuan sa Brgy. Caingin.

Kumpleto sa pasilidad ang Southville 4 gaya ng tubig, kuryente at kongkretong kalsada. Bukod dito ay naroroon din ang tanggapan ng NHA at Goldenville Realty Development Corporation (GRDC) upang tugunan ang ilan nilang mga katanungan at mga suliranin kaugnay sa kanilang bahay. Sisimulan na rin ang pagtatayo ng paaralan at maliit na palengke. Samantala, ilang housing units ang inilaan bilang pansamantalang klasrum habang di pa natatapos ang school building.

Ayon sa pamahalaang lungsod, hindi dito nagtatapos ang programa ng pamahalaan. Maglalaan din si Mayor Arlene Arcillas-Nazareno ng Daycare Center at programang pangkabuhayan para sa mga pamilyang naninirahan dito.

Nagpaabot din ng pasasalamat sa pamahalaan ang mga nabiyayaan ng programang pabahay sa pamahalaan, dahil sa wakas ang pangarap nilang disenteng tirahan ay natupad na. Ngayon ay makakaahon na sila sa paninirahan nila sa tabing riles. (CIO-Santa Rosa City)

Sign Up Now!!!!

Sign up for PayPal and start accepting credit card payments instantly.

Disqus for Balitang San Pablo : Online