April 15, 2009

ALAALA KINA ALICBUSAN, ISINASAAYOS NA

Angkop kayang alaala?

Isang magandang pagkakataon, na si SPO1 (o Sgt.) Norman Jesus Platon, na tubong M’lang, North Cotabato, na dating kagawad ng Philippine Constabulary, ay natalaga dito sa San Pablo City Police Station simula noong nakaraang Buwan ng Pebrero, at kaagad niyang napansin ang kulay puting pananda para sa alaala ni Major Leopoldo Amutan Alicbusan ng 27th Philippine Constabulary Company, na nasawi sa pakikipaglaban sa isang pangkat ng Hukbong Magpapalaya sa Bayan (HMB) o ang sandatahang lakas ng Parftido Kumunista noon, na lumusob sa kalunsuran noong madaling-araw ng Marso 29, 1950. Kasama niyang nasawi sina S/Sgt. Cenon Salvador, Sgt. Atanacio Maliberan, at Pfc Cipriano Panquito, nang salubungin nila ang lumulusob na kalaban ng kapayapaan sa may MRR Crossing sa may Bagong Pook, na noon ay hindi pa lubhang marami ang naninirahan, upang mailigtas ang mga sibilyan sa mga ligaw na bala o crossfire.

Nakadama si Sarhento Platon ng kalungkutan sa nakitang kaayusan ng pananda para sa alaala ng mga bayaning kasapi ng Philippine Constabulary, kaya sa sariling inisyatibo ay nilinis niya sa tulong ng eskuba, sabon at tubig ang munting monumento, at ng lumitaw ang lapidang yari sa marmol, ay pininturahan niya ng itim ang mga letra ng pangalan ng apat (4) na dinadakilang kawal., at ng sumapit ang Marso 29, 2009, o ang ika-59 anibersaryo ng kamatayan ng nabanggit na ipinagkakapuring konstable, ay tinirikan niya ito ng kandila, at inanyayahan niya ang kanyang mga kasamahang pulis na mag-ukol ng isang minutong katahimikan para sa alaala nina Major Alicbusan.

Laking kagalakan ni SPO1 Norman Jesus Platon na noong Huwebes ng umaga, Abril 9, 2009, nang matapos ang palatuntunan sa paggunita sa Araw ng Kagitingan na ginanap sa harapan ng Pananda Para sa Alaala ng mga Kawal na Napalaban Sa Bataan at Corregidor noong nakaraang Ikalawang Digmaang Pandaigdig, ay binati siya ni Chief of Police Raul Bargamento sapagka’t bunga ng kanyang inisyatibo, ay napagpasiyahang ang obelisk ay ipaaayos.

Ang batong pananda para sa alaala ng apat (4) na bayani ay ipinatayo ng pangasiwaang lunsod sa pamamatnugot ni Mayor Marciano E. Brion Sr. na pinasinayaan noong Marso 29, 1951, at nadalaw ni Pangulong Ramon F. Magsaysay noong madaling-araw ng Marso 29, 1954 dahil sa kanyang ugaling maglibot sa mga lalawigan kung gabi na sakay lamang sa ordinaryong sasakyang ng Hukbong Sandatahan ng Pilipinas.

Isinilang sa Bayan ng Calamba noong Oktubre 12, 1912, si Major Leopoldo Amutan Alicbusan ay nasawi sa gulang na 37 taon, limang buwan, at 17 araw. (Ruben E. Taningco)

April 13, 2009

Alicbusan on April 9, 2009

SA MGA KINAUUKULAN:

Sa darating na Abril 9, 2009, ay gugunitain ang ika-67 Araw ng Kagitingan upang kilalanin ang mga kawal na naghandog ng kanilang buhay sa mga larangan ng labanan sa Bataan at Corregidor, at ako po ay magalang na nagmumungkahi na sana naman ay mapagtuunan ng pansin ang mga kawal na nagbuwis ng buhay upang mapangalagaan ang katahimikan ng Lunsod ng San Pablo.


Noong nakaraang Marso 29, 2008, ay walang nakaalaala na ang araw na yaon ay bahagi ng kasaysayan ng Lunsod ng San Pablo, sapagka’t iyon ang ika-58 taon ng kamatayan ni Major Leopoldo Amutan Alicbusan ng 27th Philippine Constabulary Company na nagbuwis ng buhay sa pagtatanggol sa kalunsuran sa pananalakay ng mga kaaway ng pamahalaan noong Marso 29, 1950.

Sasapit na muli ang Marso 29, at marahil ay tulad sa mga nakaraang taon, ay walang makakaalaala sa naging bahagi ng matapang na pinuno noon ng mga konstable sa kasaysayan ng Lunsod ng San Pablo.

Ang nakalulungkot pa, maging ang obelisk o batong pananda para sa alaala ng kabayanihan ni Major Alicbusan at mga tauhang sina S/Sgt. Cenon Salvador, Sgt. Atanacio Maliberan, at Pfc Cipriano Panquito na nakatayo sa gilid isang himpilan ng pulisya sa may Doña Leonila Park ay malapit ng mabuwal dahil sa isinasagawang konstruksyon ng City Engineer’s Office Building.

Si Major Alicbusan ay nasawi sa gulang na 37 taon, limang buwan, at 17 araw (Oktubre 12, 1912), at naiwanan niyang balo si dating Gregoria Carandang na namayapa noon lamang Taong 1994.sa gulang na 80 taon sang-ayon sa panganay na anak na si Adoracion C. Alicbusan-Virtucio.

Kapansinpansin na tuwing ipinagdiriwang ang Araw ng Kagitingan, at maging ang Pambansang Araw ng mga Bayani kung sumasapit ang huling Araw ng Linggo ng Buwan ng Agosto, ay laging inaalaala ang mga kawal na nagbuwis ng buhay sa larangan ng labanan sa Tangway ng Bataan at Isla ng Corregidor, subali’t hindi na maalaala ang mga kawal na namatay sa pakikilaban upang maipagtanggol ang Lunsod ng San Pablo sa mga kaaway ng katahimikan at kapanatagan.

Isang magsasakang anak ng isang pulis na napatay sa paghabol sa isang grupo ng magnanakaw ng kalabaw noong hindi pa bumabagsak ang Martial Law ang nagtatanong kung hindi kaya nararapat na ang obelisk sa alaala ni Major Leopoldo A. Alicbusan ay ilipat sa isang angkop na lugar o palakihin at ipatong sa isang maayos na pedestal upang mabigyan ng dangal ang alaala ng mga nasawing kawal upang magsilbing halimbawa para sa mga kabataan ng kasalukuyan upang sila ay mapunlaan ng tamang pagpapahalaga sa marapat na pagpapakasakit para sa kagalingan ng bayan? Ang ganitong pagpapaunlad ng mga panandang pangkasaysayan na mahigit na sa 50 taong natayo at ipinalalagay ng historical artifact o archaelogical treasurer ay ipinahihintulot ng mga batas na ipinatutupad ng National Historical Institute o ng National Commission for Culture and the Arts (NCCA).

Sign Up Now!!!!

Sign up for PayPal and start accepting credit card payments instantly.

Disqus for Balitang San Pablo : Online