June 5, 2009

New Three Class Room @ San Pablo Central School



Ang three-room schoolbuilding na naipatayo mula sa pondong nahiling nina Congresswoman Ma. Evita R. Arago, Mayor Vicente B. Amante, at City Councilor Danilo R. Yang mula kina Pangulong Gloria Macapagal Arroyo at DPWH Secretary Hermogenes E. Ebdane Jr. na itinayo ng New Rich General Contractor upang ipalit sa isang kondenadong schoolbuilding sa San Pablo Central School sa superbisyon ni District Engineer Federico L. Concepcion ay may maayos na kaanyuan, at kinapapansinan ng katatagan. Ang nagtayong kontratista ay nakatala sa umiiral na DPWH Registry of Prequalified Contractors. Marami ang nagsasabing ito na ang pinakamaayos na bagong tayong school building sa Lunsod ng San Pablo ngayon.

FISHERFOLK DAY SA LUNSOD, MAKAHULUGANG NAIPAGDIWANG

BFAR-Region IV-A Fisherfolk Director Edison Y. Jaramillo, National Fisherfolk Director Felizardo Lim, Senior Board Member Karen C. Agapay, BFAR Assistant Director Benjamin Tabios Jr., at PAMPANO President Rafael Olivera.

Ang pangunahing layunin ng Tilapia Festival bilang tampok na bahagi ng pagdiriwang ng Fisherfolk Month sa Lunsod ng San Pablo ay hindi lamang upang turuan ang mga mangingisda ng makabagong teknolohiya sa pagaalaga ng tilapia, at paghahanda ng iba’t ibang lutuing salig sa isdang ito, kundi upang palaganapin ang tamang kamalayan at kasanayan sa pangangalaga at pangangasiwa ng kapaligiran ng paligawan ng tilapia, sa kadahilanang hindi na mapasusubalian ang naitutulong ng industriya ng tilapia sa pagpapataas ng at pagpapatatag sa antas ng kabuhayan, hindi lamang ng Lunsod ng San Pablo at Lalawigqan ng Laguna, kundi ng buong bansa, sang-ayon kay Pangulong Edison Y. Jaramillo ng Seven Lakes Fisheries and Aquatic Resources Management Councils ay siyang natalagang “Fisherfolk Director” ng BFAR-Region IV-A (CALABARZON) na ang panunungkulan ay sa buong buwan ng Mayo 2009.

Ang ginanap na Tilapia Festival ay sa pagtataguyod ng Tanggapan ni Alkalde Vicente B. Amante, at Laguna Lake Development Authority (LLDA), na tumanggap din ng tulong mula sa Tanggapan ni Provincial Administrator Dennis S. Lazaro. Ang palatuntunang cultural na ginanap sa PAMANA Hall ay may suporta mula sa Kiwanis Club of Siete Lagos na pinamamatnugutan ni Pangulong Merle Javaluyas, at ang pangangalaga ng kapayapaan at kaayusan ay sa tulong ng Alpha Company ng 1st Laguna Ready Reserve Batallion na pinangasiwaan ni Ten. Antonio Aviquivil.

Naging pangunahing panauhin sa maghapong pagdiriwang sina National Fisherfolk Director Felizardo Lim, Atty. Benjamin Tabios Jr., BFAR Assistant Director na kumatawan kay BFAR Director Malcolm I. Sarmiento. Pagtugon sa paanyaya ni Fisherfolk Director Edison Y. Jaramillo, ay nagpaabot ng pagbati si Senador Manuel B. Villar, at sumubaybay sa mga kaganapan sina Board Members Karen C. Agapay at Ray Paras. (Ruben E. Taningco)

BGEN FLORANTE B MARTINEZ ASSUMES COMMAND OF 2ID

CAMP GENERAL MATEO CAPINPIN, Tanay Rizal - A Brig. General Florante B. Martinez was installed as the new commander of the 2nd Infantry (Jungle Fighters) Division of the Philippine Army last Tuesday, June 2, 2009. He accepted the responsibility as 2ID’s acting Commander from 2ID’s outgoing commander Major General Roland M. Detabali during the traditional military change of command ceremony held at Camp Capinpin parade ground. The activity was presided by the Philippine Army’s Commanding General, Lt. Gen. Delfin N. Bangit AFP.

Brig. Gen. Florante B. Martinez is a member of Philippine Military Academy class of 1978. He earned his first star rank during his stint as 2ID’s Assistant Division Commander from 2008 until this date. Being 2ID’s assistant Division Commander, he now assumes command of 2ID as acting Division Commander. He was assigned to various sensitive positions in the AFP. He was the Commanding Officer of 56th Infantry Battalion in Mindanao. Also, he was then the Brigade Commander of 403rd Brigade under the 4th Infantry Division. He will be retiring from the military service on 09 November 2009.

The 2ID’s outgoing commander, Major General Roland M. Detabali will assume in full capacity as Commander of the Southern Luzon Command of the Armed Forces of the Philippines.

The activity was participated by the officers, men, civilian employees, relatives, close friends, media and families of the outgoing and incoming 2ID commanders. (Frank L. Sayson)

IKA-111 TAON NG KALAYAAN, IPAGDIRIWANG SA LUNSOD

Napag-alaman mula sa City Information Office na sina City Schools Superintendent Ester C. Lozada at dating City Mayor Palermo A. Bañagale, Pangulo ng San Pablo Cultural and Historical Society, ang mga magiging pangunahing tagapagsalita sa nakatakdang paggunita sa Ika-111 Anibersaryo ng Pagkapagpahayag ng Kalayaan ng Bansa ngayong Biyernes, Hunyo 12, 2009 sa paanan ng Bantayog ng Pambansang Bayani sa Liwasang Lunsod simula sa ganap na ika-7:30 ng umaga.

Ang doxologia at ang pag-awit ng Lupang Hinirang ay pangungunahan ng koro ng mga guro ng Sangay ng Lunsod ng San Pablo, samantala ang panibukas na pananalita ay ipagkakaloob ni Gng. Lerma S. Prudente, tagapangulo ng San Pablo City Tourism Council.

Nakatakda ring magsalita si Mayor Vicente B. Amante pag-alinsunod sa tradisyon bilang punong tagapagpaganap ng lunsod, na susundan ng pangwakas na pananalita ni City Administrator Loreto S. Amante. Ang palatuntunan ng paggunita ay tatapusin sa pamamagitan ng pag-aalay ng bulaklak sa paanan ng bantayog ni Dr. Jose P. Rizal, na pangungunahan ni Alkalde Vicente B. Amante ang mga pinunong lokal, at lalahukan din ng mga samahang sibiko at organisasyon sa paglilingkod sa lunsod (Ruben E. Taningco)

PREQUALIFIED CONTRACTOR, MAPAGTITIWALAAN

Kung napapansin na sa mga government project ay mga pamilyar na pangalan ng mga kontratista ang nakalagay sa taurpulin o billboard na gumagawa nito, ito ay hindi nangangahulugan na may paboritong kontratista ang DPWH, kundi nangangahulugan lamang na ang pangasiwaan ng DPWH sa isang engineering district ay umaalinsunod sa itinatagubilin ng Republic Act No. 9184 o Government Procurement Act na pinagtibay noon pang Enero ng 2003 na nagpapahayag ng mga layunin upang mapalaganap ang kamalayan sa marapat at mabuting pangangalaga sa salapi ng bayan ng lahat ng sangay, ahensya, kagawaran, at subdibisyon ng pamahalaan, kasama na ang mga korporasyon na kontrolado ng pamahalaan sang-ayon sa isang state auditor ng Commission on Audit na nakatalaga dito sa Lalawigan ng Laguna. Ang nabanggit na batas ay gagawang maging ang karaniwang mamamayan ay masubaybayan ang nagiging kayarian ng paggawain, magpapasigla sa malayang pangangalakal, at magkakaroon ng iisang pamantayan sa pamimili ng kagamitan ng pamahalaan, at matutukoy ang mga may pananagutan, na magbubunga ng katipiran sa mga gugulin ng pamahalaan.

Nabanggit ni District Engineer Federico L. Concepcion ng DPWH-Laguna Sub-District Engineering Office na naka-base sa Barangay Del Remedio sa San Pablo City, na simula nang ipatupad ang Government Reformed Procurement Act noong unang buwan ng Taong 2004, ay inalis na ang kilala noong Prequalifications, Bids and Awards Committee (PBAC) na ang tagapangulo ay gobernador at alkalde, at ang ipinalit ay Bids and Awards Committee (BAC) na binubuo ng mga career official.

Sa mga pasubasta na ipinatatawag ng Bids and Awards Committee, ay tanging mga pre-qualified contractor ang maaaring lumahok, kaya nagiging kapansinpansin na ilang pangalan ng kontratista ang nagwawagi sa bidding, batay sa uri o kategorya ng paggawain.

Sa implementasyon ng public works, tulad ng pagsasaayos ng kalsada, at pagtatayo ng mga school buildings, Ang kinikilalang prequalified contractor ay yaong mga kontratista na pinagkalooban ng Department of Public Works and Highway (DPWH) ng “Certificate of Qualifications” at ito ay maitala sa DPWH Registry matapos na makapaglahad ng Contractor’s Prequalification Statements batay sa kategorya ng proyektong ninanasa nilang lahukan, tulad ng pagpapahayag sa kanilang puhunan, mga kasangguning propesyonal, mga pag-aaring heavy equipments, at kasaysayan ng kontratista na makakapagpakita sa kakayanan nitong maipatupad ang proyekto.

Sa obserbasyon ni District Engineer Federico L. Concepcion, simula ng mapagtibay ang Implementing Rules and Regulations (IRR) para sa Reformed Procuement Law, ay naiwasan na ang paglahok ng mga kontratistang walang sapat na puhunan na inaabandana ang paggawain, o ipinagbibili ang kontrata sa mga kontratistang walang pinanalunang kontrata.

Dahil sa ang mga prequalified contractor ay nakatutugon sa kinakailangang katangian ng kontratista, pinatutunayan ng karanasan sa mga engineering district dito sa Laguna na wala na ang mga kontratistang matapos magwagi sa pasubasta ay ibinibenta ang kontrata sa iba, o mga kontratistang inaabandona ang kanilang kontrata dahil sa wala na silang magugol sa pagrenta ng kagamitan at pasahod sa mga manggagawa. Ang mga kontratista ngayon ay nakasusunod na sa tinatawag na Project Evaluation Review Technique/Critical Path Method (PERT/CPM) sa paghahanda ng mga pang-araw-araw na gawain sa nalolooban ng itinatakdang panahon sa kontrata, at natatapos ang proyekto sa takdang araw. (Ruben E. Taningco)

PAGLALADLAD NG BANDILA HANGGANG HUNYO 30

Kaugnay ng paggunita sa ika-111 Anibersaryo ng Pagkapagpahayag ng Kalayaan ng Bansa, ngayong Biyernes, Hunyo 12, 2009, pag-alinsunod sa itinatagubilin ng Batas Republika Bilang 8491, na lalong kilala bilang The Flag and Heraldic Code of the Philippines, ay hinihikayat ang lahat, maging ito ay pampubliko o pampribadong tanggapan at ahensya, pansariling tanggapan at paggawaan, at tahanan, na nasa kahabaan ng mga hayag na lansangan, na magladlad o mag-display ng Watawat ng Pilipinas simula ngayong Mayo 28 (Pambansang Araw ng Bandila) hanggang Hunyo 12 (Araw ng Kalayaan), gaya ng ipinahihintulot sa nabanggit na batas, ang panahon ng paglaladlad ng bandila ay itinutuloy hanggang Hunyo 30, 2009 batay sa tagubiling pinalabas ni Local Government Secretary Ronaldo Puno na nalathala sa website www.dilg.gov.ph.

Sa pag-aatas sa City Information Office na magsagawa ng malawakang diseminasyon ng impormasyon ukol dito, sinabi ni Alkalde Vicente B. Amante na ito ay upang maipadama ng mga mamamayan, saan mang antas ng lipunan at pamumuhay sila nabibilang, ang paggalang at mataas na pagpapahalaga sa simbolo ng pambansang pagkakaisa at katangiang nakatatayo bilang isang malaya at nagsasariling bansa. Ang Bandila ng Pilipinas ang kabuuan ng pangarapin, kasaysayan, kultura, at tradisyon ng Sambayanang Pilipino, ayon pa sa pununglunsod. (Ruben E. Taningco)

Sign Up Now!!!!

Sign up for PayPal and start accepting credit card payments instantly.

Disqus for Balitang San Pablo : Online