September 5, 2007

13th National Crime Prevention Week

SAN PABLO CITY – Tuwirang binanggit ni Director Emilio P. Salumbides ng National Police Commission-Region IV-A na ang krimen ay hindi masusugpo sa pamamagitan lamang ng pagtutulungan ng pulisya, ng tagausig, at ng hukuman, kundi ito ay pananagutan ng lahat, lalo na ng mga karaniwang mamamayan, na siyang tuwirang apektado ng mga nagaganap na krimen, at maging ang napapaulat na pag-abuso ng ilang kagawad ng pulisya ay hindi rin maihahanap ng katarungan kung walang tulong ng mga mamamayan.

Si Atty. Salumbides ang naging pangunahing tagapagsalita sa palatuntunan ng paglulunsad ng ng 13th National Crime Prevention Week na itinaguyod ni Alkalde Vicente B. Amante at ng Sangguniang Panglunsod noong Sabado ng umaga Setyembre 1, 2007 sa San Pablo Central School Stadium.

Ang National Police Commission o NAPOLCOM ay isang ahensyang iniaatas ng 1987 Constitution, na ipinatutupad sa bias ng mga Batas Republika Bilang 6975 at 8551 na lalong kilala bilang “PNP Reform and Reorganization Act of 1998” at ito ang may pananagutang magsiyasat sa mga anomalyang kinasasangkutan ng mga pulis, nangangasiwa sa entrance examination sa mga nagnanais sumapi sa cuerpo ng pulisiya; at magpataw ng kaparusahan sa mga nagkamaling kagawad ng pulisiya. Ang tagapangulo ng NAPOLCOM ay ang Interior and Local Government Secretary.

Sa panig ni Director Roberto C. Abejero ng Department of the Interior and Local Government-Region IV-A kanyang binanggit na napapanahon ng sa lebel ng barangay ay dapat na palakasin ang Barangay Disaster Coordinating Council, upang sakupin na rin nito ang gampanin ng ibang’ sanggunian tulad ng Barangay Council on the Protection of Children, Barangay Committee on Humang Rights, at mga katulad nito, sapagka’t sa katotohanan, ang mga komiteng ito ay iisa ang miyembro, na bilang mga organisasyon ay pawang ang punong barangay ang tagaangulo.

Naging tagapagsalita rin ang Police Regional Director na kinatawan ni Supt. Sergio Dimandal, at iba pang regional officials ang mga ahensyang ang gampanin ay may malaking kaugnayan sa pagsugpo sa krimen. (RET)

Maaasahang Kaibigan Ang SSS

SAN PABLO CITY – Sa pagsapit ng ika-50 taon ng pagkakatatag ng Social Security System (SSS) noong nakaraang Sabado, Setyembre 1, 2007, sa pakikipanayam sa mga kagawad ng local mass media ay nabanggit ni Assistant Vice President Aida V. de los Santos ng South Luzon Cluster, na sa nakalipas na limampong taon, o simula noong Setyembre 1, 1957, ang SSS ay matapat na kaagapay sa mga pangangailangan ng manggagawa; kaibigan sa pagbibigay ng makabuluhang proteksyon sa mga kasapi ng sistema at kanilang pamilya; at kabalikat sa pagpapaunlad ng kabuhayan o ekonomiya ng bansa sa pamamagitan ng pagpapatupad ng isang maunlad at angkop na social insurance program o palatuntunang magkakaloob ng kapanatagang panglipunan.

Tuwirang tinukoy ni de los Santos na ang SSS sa nakaraang limang (5) dekada ay nakapagkaloob ng ginintuang paglilingkod bilang tunay na kasama na bumabalikat sa mga suliranin ng mga manggagawa.

Masasabing isang magandang alaala na ipinagkaloob ng mga mamamayan, na natipon ng Social Weather Station (SWS) ang kaisipang ang Social Security System pinakapangunahing government financial institution na may makatotohanang malasakit na maiwasan ang corruption sa kanilang operasyon sa pamamagitan ng maayos at makabuluhang pagkikintal sa kaisipan ng mga pinuno at kawani ng korporasyon sa halaga ng pagiging matapat sa paglilingkod sa mga mamamayan, pahayag pa ni de los Santos. (RET)

Ang Committee on Public Market and Slaughterhouse

abanggit ni Concejal Paolo Jose Cristobal C. Lopez na ang Committee on Public Market and Slaughterhouse ng Sangguniang Panglunsod na kanyang pinamamatnugutan bilang chairman, ay hindi isang fact finding committee na ang gampanin ay humanap ng mga maipalalagay na pagkakamali sa operasyon ng pamilihan at matadero ng lunsod, pagkatapos ay kondenahin ito, kalakip na ang mga pinunong lunsod na may kaugnayan sa pagpapakilos at pamamahala rito. Sa halip, ang komite ay isang kalipunan ng mga kagawad ng sanggunian na nag-aaral at bumabalangkas ng mga palatuntunang inaakalang magtataas sa antas ng kalalagayan ng pamilihan at ng matadero para sa kagalingan ng mga mamamayan, at para may mapagkunan ng pondo ang pangasiwaang lunsod na ibabalik sa mga mamamayan sa pamamagitan ng mga paglilingkod na pangkalusugan, panglipunan, at pampaaralan.

Nabanggit ni Concejal Pamboy na komplekado ang operasyon ng pamilihang lunsod, sapagka’t ito ay hindi pangsariling pananagutan ng pangasiwaang lunsod. May mga bagay sa pamilihang ang isinasaalang-alang ay ang mga palatuntunan at alituntuning ipinatutupad ng Department of Trade and Industry, may mga alituntunin o batas, tulad ng Code on Sanitation of the Philippines na pananagutan ng Department of Health, at sa dahilang ang pamilihang lunsod ay nalilibot ng mga seksyon ng national road, tulad ng A. M. Regidor Street, A. . Flores Street, at ng P. Paterno Street, kaya ang suliranin ng sidewalk vendor ay nasa ilalim ng hurisdiksyon ng Departmet of Public Works and Highways.

May mga alituntuning inaakalang malupit ang epekto sa mga nagsisipagtinda, subali’t ang mga pambansang alituntunin ay dapat na ipinatutupad, sapagka’t kung hindi ito maipatutupad, ay sila naman ang pag-uusigin sa pagsusulong ng kinauukulang ahensya ng pamahalaan, kaya dapat ding unawaing ang mga pinunong lokal ay mayroon ding pananagutan dapat isaalang-alang nupang huwag silang maipagsumbong ng pagpapabaya katungkulan. (Ben Taningco)

OMBUDSMAN REGIONAL OFFICE, GANAP NA NAGLILINGKOD

Nagpapaalaala si Deputy Ombudsman for Luzon Victor C. Fernandez na ang Ombudsman Regional Office sa Calamba City na pormal na binuksan noong nakaraang Mayo 15, 2006 o 15 buwan na ang nakalilipas ay ganap ng operasyonal at ang mga nakatalaga ritong Associate Graft Investigation Officer ay pamilyar na sa kalalagayan ng mga lalawigang bumubuo ng CALABARZON Region. Ang kanilang spacious office space ay nasa 2nd Floor ng New City Hall Building sa kahabaan ng Bacnotan Road sa Barangay Real sa Calamba City, at ang kanilang telepono ay (049) 545-0220. Ang ZIP Code ng Calamba City kung ang komunikasyon ay ipadadala sa pamamagitan ng koreo ay 4027.

Ayon kay Associate Graft Investigation Officer Elmo A. Unay, isa sa pangunahin nilang naipaglilingkod sa mga kawani at manggagawa ng alin mang ahensya ng pamahalaan, pambansa, pangrehiyon, at panglokal, ay ang pagkakaloob ng clearance sa mga nagbabalak na magretiro o magbitiw na sa kanilang tungkulin. Ang kinakailangan lamang ay magdala ng kanilang latest service record, at indorsement ng may pananagutang pinuno ng tanggapan o ahensya, at ang kaukulang clearance o kasulatang ay madali nilang maipagkakaloob, na ang applicant ay hindi na kinakailangang magsadya pa sa Office of the Ombudsman na nasa National Government Center sa Quezon City.

Ang pangunahing gampanin ng Ombudsman Regional Office sang-ayon sa paalaala ni Ombudsman Victor C. Fernandez ay ang tumnggap ng reklamo o pagsusumbong laban sa sino mang pinunong bayan at tauhan ng pamahalaan, na kasama sa maaaring ipagsumbong ay ang mga halal na pinunong barangay, sapagka’t sila ay pangunahin sa mga kinikilalang public official.

Ang Office of the Ombudsman ay walang sinisingil na filing fee sa mga sumbong o reklamong inihaharap sa kanila. (Ben Taningco)

(Request to all publishers: Sana ay malathala ito sa lahat ng edition, bilang public service, at kabatiran ng lahat, lalo na ng mga nasa kanayunan. RET)

Sign Up Now!!!!

Sign up for PayPal and start accepting credit card payments instantly.

Disqus for Balitang San Pablo : Online