October 17, 2008

SAN PABLO JAYCEES, PANG-6 SA BUONG BANSA


Ang Junior Chamber International (JCI) San Pablo Seven Lakes, na lalong kilala bilang San Pablo “Seven Lakes” Jaycees, Inc. na sa Administrative Year 2008 ay nasa ilalim ng liderato ni JCI Member Normandy Inarda Flores bilang Chapter President ay nagtamo ng Merit Award for Best Local Chapter for Category 3 (with 25 – 45 active members) ng ganapin ang 60th National Convention sa Zamboanga Convention Center sa Depolog City sa Zamboanga del Norte noong nakaraang isang Biyernes, Oktubre 10, 2008. Natamo rin ng San Pablo Jaycees ang gawad na “Best United Nation Millennium Development Goals Project “Stop AIDS. Keep The Promise Year 2”, na sa pangkalahatan ay nalagay ang JCI-San Pablo Seven Lakes sa Ranked 6 sa Final Junior Chamber International Philippines Efficiency Awards (JCIPEA) na kinikilalang isang malaking karangalan para sa lunsod kung isasaalang-alang sa na buong bansa ay may 200 aktibong Jaycee Chapter. Ang pagkilala ay naglagay sa San Pablo Jaycees na isa sa 10 pinakaaktibong chapter sa Pilipinas sa nakalipas na 10 taon.


Noong nakaraang taon, sa 59th National Convention na ginanap sa Cebu City ang JCI San Pablo Seven Lakes ay Ranked 10 sang-ayon kay National President Albert Raphael Angelo A. Lesaca nang siya ay dumalo sa 60th Induction of Officers ng local organization (LOM) na ginanap sa Coco Palace Hotel sa lunsod na ito. (Ben Taningco)

October 16, 2008

SPC Police Station, Kinilala ng Office of Civil Defense

CAMP VICENTE LIM, Laguna – Dahil sa ipinamamalas na kahandaan sa pagtugon sa mga tawag na pangkagipitan kung may nagaganap na kalamidad at sakunang nagdaraan sa Lunsod ng San Pablo ay kinilala ng Office of Civil Defense (OCD)-Region IV-A ang kabayanihan ng San Pablo City Police Station sa seremonyang ginanap dito noong nakaraang Biyernes na personal na tinanggap ni P/Supt. Joel C. Pernito, Chief of Police, mula kina Chief Superintendent Ricardo Padilla, Regional Director ng Police Regional Office No. 4A, at chairman ng Regional Disaster Coordinating Council (RDCC), at Office of Civil Defense Region IV-A Regional Director Vicente E. Tomazar, hepe ng RDCC Secretariat.

Kinilala rin si Atty. Marius F. Zabat, Head Executive Assistant sa Tanggapan ng Punonglunsod,,bilang Action Officer/Disaster Manager ng San Pablo City Disaster Coordinating Council (SPCDCC). Ang tagapangulo ng SPCDCC ay si Alkalde Vicente B. Amante.

Magugunitang mahusay na napangasiwaan ng SPCPS ang epekto ng pagkabagsak ng isang helicopter sa isang bahay sa lunsod noong nakaraang taon. Walang nasawi sa nabanggit na sakuna, at hindi rin nakalikha ng sunog na karaniwang nagaganap sa plane crash.

Nitong kasagsagan ng Bagyong Milenyo ay sinuong din ng kapulisan ang panganib sa pagtungo sa mga barangay upang umalalay at tumulong sa mga taumbayan na napinsala ang kanilang tahanan, bagama’t na nawasak din ang kanilang himpilan.

Sa kanyang acceptance speech ay pinasalamatan ni Chief of Police Joel C. Pernito si City Mayor Vicente B. Amante sa suportang ibinibigay sa kapulisan ng pangasiwaang lunsod na aniya’y sinusuklian lamang nila ng angkop na paglilingkod sa mga mamamayan. Magugunitang ang San Pablo City Police Station noong nakaraang Buwan ng Agosto ay kinilala ng PNP-Regional Office No. IV-A sa pagkakaroon ng maayos na Community Relations Program. (SEVEN LAKES PRESS CORPS)

October 15, 2008

5,053 MEDICARE CARD, IPINAMAHAGI NI DSL

NAGCARLAN, Laguna – Umabot sa kabuuang 5,053 PhilHealth ID Card na ipinatala ng Pangasiwaang Panglalawigan ng Laguna ang ipinamahagi ni Provincial Administrator Dennis S. Lazaro noong Martes ng umaga sa isang pagtitipong ginanap sa municipal covered court dito na sinaksihan nina Mayor Rolen Isleta Urriquia ng Rizal, Mayor Cesar Cordova Sulibit ng Liliw, at Mayor Nelson M. Osuna ng bayang ito.


Batay sa record ng PhilHealth San Pablo City Service Center, ang bilang ng beneficiaries ay 1,343 taga-Rizal; 1,699 taga-Liliw; at 2,011 taga-Nagcarlan, at bago isinagawa ang aktwal na pag-aabot ng PhilHealth Medicare Card ay ipinaliwanag ni Chief Social Insurance Officer Eloisa B. Tagbo ang tamang paggamit ng PhilHealth Identification Card sakali’t mayroong kagawad ang kanilang sambahayan na dapat pumasok ng pagamutan,


Ipinaalaala ni Bb. Tagbo na ang PhilHealth Card ay may bisa lamang sa loob ng isang taon, kaya dapat na ito ay kanilang laging inuusisa, upang bago ito mawalan ng bisa ay ipaalam kaagad sa Tanggapan ng Punonglalawigan sa pamamagitan ng Municipal Social Welfare and Development Officer sa munisipyong kanilang pinanahanan.


Makabubuti ayon kay Bb. Tagbo na may iniingatan na silang photo copy ng kanilang PhilHealth ID Card at ng kanilang Membership Data Record (MDR), sapagka’t ito ang hahanapin sa kanila pagpasok sa isang accredited hospital. Ang Medicare Program na ipinatutupad ng Philippine Health Insurance Corporation ay gumagawang pantay ang pribilihiyo o kaluwagang tulong na tinatanggap ng mahirap at mayaman, bagama’t katotohanang ang mga kumikita ng malaki ay malaki ang kontribusyong binabayaran taon-taon.


Sa pahayag ni Provincial Administrator Dennis S. Lazaro, kanyang ipinaaalaala na simula ng si Gobernadora Teresita S. Lazaro ay manungkulang punonglalawigan, ay taunang muling binabayaran ang premium para sa mga mga mahihirap na pamilyang kanilang ipinatatala upang masakop ng National Health Insurance Program, at sa pagpasok ng bagong taon ay patuloy na lumalaki ang bilang ng nabibiyayaang mahihirap na pamilya sa buong lalawigan. (Ben Taningco)

October 13, 2008

SAN PABLO CENTRAL SCHOOL, BALAK HATIIN SA EAST AND WEST

Mawawala ng sariling identity ng San Pablo City Central School kung magtatagumpay ang mga nagsusulong upang ito’y hatiin at gawing dalawang entity, ang San Pablo West Elementary School, at ang San Pablo East Elementary School.


Inaari ng marami na ang balakin ay isang masamang biro, na tuwirang pagyurak sa kasaysayan ng lunsod. Isang biro na sa hinagap ay walang mag-aakalang may magbabalak man lamang. Subalit seryoso ang mga namamahala ng mga paaralan, at hindi sila nagbibiro na palitan ang nakatitik sa pedestal ng main gate ng kampus ng paaralan sa kahabaan ng Avenida Rizal na tila baga buong giting na nakatayo upang ipagmalaki ang yaman ng mahabang tradisyon bilang pangunahing pandayan ng mga murang isipan. Ang nabanggit na main gate structure at ang Minerva flagpole ay patayo ng mga Dakilang Karakter ng Kasaysayan ng Bansa, tulad nina Dating Mahistrado Estanislao Fernandez at Dr. Eufronio Alip Sr..


Ang paghati sa Central School ay simbolo ng kawalang pakundangan sa kagandahang loob ng mga pamilyang naghandog ng lupaing pinagtayuan ng nasabing paaralan, na ang tanging pagkakamali ay hindi nalagyan ng kolatilya ang likod ng Titulo Torren na ang nasabing donasyon ay para sa San Pablo City Central School lamang!!! Mawawalan ng saysay ang “gesture” ng mga pamilyang ito na hindi man lamang humiling na ang nasabing paaralan ay ipangalan sa kanilang alaala..


Bagama’t hindi nagbibiro sina City Schools Supertintendent. Dr, Ester C. Lozada etal, ay marami ang natatawa, na sa kawalan ng pag-aakalang may darating na ganitong pangyayari ay naiiling na lamang. Kung may sumasang-ayon man ay nakasisigurong malulunod sa sigaw ng pagtutol buhat sa mas higit na dami ng taumbayan. Tutol dito ang mga guro, tutol din ang mga magulang lalo’t higit ang mga alumni at mga kasalukuyang mag-aaral.


Ang lahat ay sumasang-ayon sa pagbabago kung dalisay ang layunin subalit kung kulapol ng kabaliwan ay ewan na lamang. Titindig ang lahat upang ito ay mapayapa at magalang na tutulan, sapagkat may pamantayan ang paglikha ng bagong anyo at ito’y sa pamamaraang wasto’t walang lisya, kapakipakinabang sa marami’t hindi sa iilan at kayang humarap sa pagsubok upang hindi yumuko magpakailan man.


Sobrang liit ng bakuran ng San Pablo City Central School para sa ating kapanahunan, ang mga institusyong yumayabong ay umaatikha ng bagong paaralan upang mapagtayuan ng mga kinakailangang edepisyo subalit nandito tayo at lilikha ng paghahati-hati. Posibleng lagyan ng bakod upang ang nasa gawing Silangan ay tawaging East samantalang ang nasa Kanluran ay kilanling West. Ano ito? Lions and Rotary Clubs?


Lakip ang angkop na paggalang at pagpapahalaga sa sinumang nagbigay ng ganitong panukala, kayo po ay nagkakamali. Dobleng pagyukod bilang pitagan kina Dr. Ester Lozada etal, ilan po sa inyo ang nagtapos sa San Pablo City Central School? (Sandy Belarmino/Class ‘71/San Pablo Central School)

4th Management Conference at Tierra de Oro Resort and Hotel


Sa ginanap na 4th Management Conference ng mga Provincial and City Parole and Probation officer sa Katimugang Tagalog (CALABARZON at MIMAROPA) na ginanap sa Tierra de Oro Resort and Hotel dito sa Lunsod ng San Pablo noong nakaraang Araw ng Miyerkoles ay ipinapanisn ni Regional Director Corazon M. Ocampo ang pangangailangang magabayan ang mga nasa subok-laya hindi lamang sa kanilang suliraning pangkabuhayan at pangkalusugan, kundi maging sa suliraning panglipunan at pang-ispiritwal, pagtanggap sa katotohanang ang mga nasa subok-laya ay mga taong kinakailangan ang Maka-Dios at Maka-Taong pakikitungo. (CIO/Gerry Flores)

Sign Up Now!!!!

Sign up for PayPal and start accepting credit card payments instantly.

Disqus for Balitang San Pablo : Online