January 17, 2011

KASALANG BAYAN SA SIMBAHAN

Sa pagtataguyod ng Cathedral Parish of Saint Paul, The First Hermit, na tatangkilikin ni Congresswoman Ma. Evita R. Aragon g Ika-3 Distrito ng Laguna, ay gaganapin ang Kasalang Bayan Sa Simbahan sa darating na Hunyo 30, 2011, araw ng Huwebes, simula sa ganap na ika-3:00 ng hapon.

     Ang handaan o reception ay sa Villa Evanzueda sa Sityo Baloc, Barangay San Ignacio pagkatapos ng seremonya sa simbahan.

    Sang-ayon kay Bb. Lorie Garcia, project coordinator sa panig ng Tanggapan ni Congresswoman Ivy Arago, ang kuwalipikasyon para mapasama sa mga ikakasal sa simbahan sa darating Hunyo 30, 2011 ay ang mga sumusunod: (1) Ang ikakasal ay kinakailangan 25 taon pataas, at sila ay dapat magsubmit ng birth certificate, partida bautismo, confirmation certificate, at Certificate of Non-Marriage o CENOMAR; (2) Kung nagsasama na ng mahigit sa limang taon, ang kinakailangan ay magdala ng birth certificate at partida de bautismo ng kanilang mga anak, at affidavit of premarital relationship; at (3) Kung kasal na sa Huwes o Alkalde, ay magdala ng kopyan ng kanilang marriage certificate.

     Ang mga magpapakasal sa alin mang kalalagayang binabanggit ay dapat na may “certificate of indigency” mula sa sangguniang barangay kung saan sila naninirahan, payo pa ni Lorie Garcia.

     Para magkaroon ng sapat na oras at maayos na maihanda ang mga papeles ng pagpapakasal sa tamang panahon, ang lahat ng nagnanasang magpakasal sa ilalim ng palatuntunang ito na “Kasalang Bayan Sa Simbahan” ng Parokya ni San Pablo, Unang Ermitanyo, at Tanggapan ni Congw. Ivy Arago, ay hinihiling na dalahin ang mga kinakailangang papeles kay Bb. Lorie Garcia sa Siesta Residencia de Arago sa Green Valley Subdivision sa Barangay San Francisco sa o bago sumapit ang Pebrero 28, 2011, na araw ng Lunes.

    Kung may mga katanungan ukol sa Kasalang Bayan sa Simbahan, si Lorie Garcia ay maaaring tawagan sa telepono bilang (049) 503-1472 o 09167728388. (Ruben E. Taningco)                        

DIWATA NG PITONG LAWA 2011

Si Bb. Mariel Cabello Amorao ng Barangay Santo Niño na may taas na 5’ 4” at tumapos ng kursong Hotel and Restaurant Management sa Laguna State Polytechnic University (San Pablo City Campus), ay isa sa napapansin sa 15 kandidata sa pagka-Diwata ng Pitong Lawa na patimpalak kagandahang itinataguyod ng ULTIMART Shopping Center na ang mga magsisipagwagi ay pararangalan at puputungan sa darating na Marso 12, 2011. (Ruben E. Taningco

WALANG BAYARING DAPAT BAYARAN SA LABAS NG CITY HALL

     SAN PABLO CITY – Pamuling nagpapaalaala si Engr. Ruel J. Dequito, hepe ng City Solid Waste Management Office,  sa lahat ng negosyante sa lunsod na ito na huwag silang magbabayad ng ano mang bayarin sa mga tauhang nagpapakilalang taga-City Hall upang maningil ng garbage fee. Ang Tanggapan ng Ingat Yaman ng Lunsod ay walang pinahihintulutang maningil ng ano mang bayarin sa labas ng One Stop Prcessing Center, o mangulekta sa mismong tindahan o puwesto ng kanilang sinisingilan.

     Sang-ayon kay Assistant City Treasurer Gerardo Ciolo, pag-alinsunod sa mga umiiral na alituntunin ng pamahalaang lokal, ay walang “collection of fee” ang dapat isagawa sa labas ng tanggapan ng kahero ng lunsod, sapagka’t walang pinuno ang dapat tumanggap at mag-ingat ng bayad para sa buwis at butaw (o taxes and fees), liban sa mga tauhang may piyansa o bonded fiscal officer,  na ang lahat ng mga tauhang ito ay pawang nasa Window 3 and 4 sa One Stop Processing Center. Kaya ang lahat ng pagbabayad para sa mga bayaring nauukol sa City Government of San Pablo, ay dapat doon lamang isagawa upang matiyak na ang pondo ay mapapalagak sa “kaban ng lunsod.”

     Hinihiling ni Engr. Ruel Dequito ang pakikipagtulungan ng lahat, lalo na ng mga pinunong barangay, na sila ay maging tagapagpaalaala sa kanilang mga kabarangay na ang City Hall ay walang pinahihintulutang maningil ng garbage fee na naglilibot sa mismong tindahan o puwesto ng kanilang sinisingilan. (Ruben E. Taningco)

GAANO KATAGAL ANG KAAGAD?

SAN PABLO CITY -  Noong nakaraang taon, isang mediaman ang nagpadala ng mga liham sa Sangguniang Panglunsod ng San Pablo, na ang kahilingan ay para sa pagpapatibay ng mga kautusan na may kaugnayan sa pangangalaga at pangangasiwa sa mga dambana at pananda na may kaugnayan sa kasaysayan, gaya ng mga sumusunod: (1) Pagpapahayag na ang harapan ng bantayog ni Gat Andress Bonifacio sa malapit sa Hagdang Bato ay “No Parking Zone” upang mapanatiling kagalang-galang at malinis ang kapaligiran nito sa lahat ng pagkakataon; (2) Pagpapahayag na ang harapan ng Old City Hall Building ay “No Parking Zone” upang mapangalagaan ang kaayusan nito bilang isang istrakturang pangkasaysayan  na natayo mahigit ng pitumpong taon ang nakalilipas, at hilinging mabalik  ang (nawawalang)  “panandang pangkasaysayan” o tablet na inilagay ng National Historical Commission ng pasinayaan ang Lunsod ng San Pablo noong Enero 2, 1941; at (3) Pagpapayos sa bantayog ni Dr. Jose P. Rizal sa Liwasang Lunsod, sa pamamagitan ng pagpapapintura sa piguren nito  ng naaayon sa espisipikasyon ng National Historical Commission of the Philippines, at pagsasaayos ng flooring  and peripheral wall ng pundasyon nito, upang maibalik ang marangal at kagalanggalang na kaanyuan nito, bago sumapit ang Hunyo 19, 2011 kung kailan gugunitain ang ika-150 kaarawan ng pambansang bayani, kaalinsabay sa pag-aalaala sa ika-100 taon ng pagkakatayo ng bantayog na nabanggit.

     Malinaw na nakatadhana sa “Guidelines on Monuments Honoring National Heroes, Illustrious Filipinos and Other Personages” na binalangkas ng National Historical Commission of the Philippines na pananagutan ng Sangguniang Panglunsod/Bayan na magpatibay ng kautusang magtatakda ng marapat na pangangalaga at pangangasiwa sa mga dambana at panandang pangkasaysayan.

     Hinihiling din sa Sangguniang Panglunsod na bumalangkas ng kautusang nagtatakda ng paglalagay ng daanan ng tao o pedestrian lane sa likuran ng pamilihang lunsod upang ang mga bumababa mula sa San Pablo City Shopping Mall ay maluwag na makaraan palabas sa P. Paterno Street.  Ang nabanggit na seksyon ng lansangan ay terminal na mga passenger jeepney na pawa naming kolurum.

     Nabanggit nina Konsehal Angelo L. Adriano, Edgardo D. Adajar, at Arnel C. Ticzon na kaagad nilang pagtitibayin ang mga mungkahing ito, pero hanggang ngayon ay wala pang napagtitibay na ordinansa para rito, kaya ang tanong ay “Gaano Katagal Ang Kaagad? (Ruben E. Taningco)

BUSINESS PERMIT, HANGGANG ENERO 20 LAMANG

ALAMINOS, Laguna – Tiniyak ni Gng. Juanita B. Rivera, isang tax collection officer na nangangasiwa sa pagkakaloob ng business permit and license sa Tanggapan ng Ingat Yaman dito, na ang araw para sa paglalahad ng application for renewal of business permit ay hanggang Enero 20 (o ika-3 araw ng Huwebes sa taong kasalukuyan), at ito ay walang palugit o extension.

    Ang nabanggit na deadline ay para sa nagmamay-ari ng mga tindahan, kasama na ang botica at restoran;  nagpapakilos ng mga bahay kalakal na namamahagi o namimili ng iba’t ibang produkto; at maging ang mga operator ng tricycle o pedecab; at pagkalipas ng nabanggit na araw, ang lahat ng bayarin nba nauukol sa business permit ay lalapatan na ng 25 porsyentong multa.

     Samantala, ang mga negosyante sa baying ito na paso o expired  na ang kanilang registration of business name sa Department of Trade and Industry, ay pinapayuhan ni Gng. Janit Rivera na magsadya na lamang sa tanggapn ng San Pablo City Chamber of Commerce and Industry, Inc. sa Girl Scouts of the Philippines (GSP) Building sa may Doña Leonila Park sa City Hall Complex sa San Pablo, na may telepono bilang (049) 561-2880,  upang doon na sila mag-renew ng kanilang registration of business name, sa halip na magsadya pa sa DTI Provincial Office na nasa kahabaan ng National Road sa Barangay Banca-banca sa Victoria, Laguna.  

    Ang mga ngayon lamang magbubukas ng negosyo, ay maaaring sa San Pablo City Chamber of Commerce and Industry, Inc. na rin ilahad ang kanilang application form for business name  registration, at nagkabisa noong Enero 1, 2011, ang bayarin ang tatanggap hinihinging halaga ay ang Department of Trade and Industry mga sumusunod: kung ang itatayong negosya ay naka-base sa barangay na labas ng poblacion ng lunsod o munisipyo (outskirt barangay) ay P415; at kung naka-base sa barangay sa sakop ng Poblacion (o City/Municipal Proper) ay P715. Ang service fee na babayaran sa San Pablo City Chamber of Commerce and Industry, Inc. ay parehong P200. Ang katulad na bayarin ang siya rin sinisingil sa mga magsisipaglahad ng application for renewal of business name.

     Makabubuting ang magpapatala ay may nakahanda ng limang (5) proposed business name, upang matiyak na ang mapapatalang pangalan ng itatayong negosyo ay walang katulad sa buong Pilipinas. Hindi rin makasasamang alam din ng aplikante ang kanyang Tax Identification Number (TIN) at mayroon siyang bagong Community Tax Receipt (o cedula).(Ruben E. Taningco) 

Sign Up Now!!!!

Sign up for PayPal and start accepting credit card payments instantly.

Disqus for Balitang San Pablo : Online