69th FOUNDATION DAY NG LUNSOD, GUGUNITAIN SA MAYO 7

Ipagdiriwang ng Lunsod ng San Pablo ang ika-69 taon ng pagkakatatag o 69^th Foundation Day sa Mayo 7 na katatampukan ng Grand Santacruzan, at ng pagpaparangal sa mga mapipiling The Outstanding San Pableño, tulad noong nakaraang taon nang ipagdiwang ang City Charter Day.

Magsisimula ang Isang Linggong Selebrasyon sa pamamagitan ng mini-Olympics sa San Pablo Central School ground, at sa Pamana Hall, na susundan ng Battle of the Bands sa Mayo 4 sa Liwasang Lunsod, at katuwaang Ms. Gay Contest sa Mayo 5.

Ayon kay City Administrator Loreto “Amben” S. Amante, tagapangulo ng Lupong Tagapagpaganap ng Pagdiriwang, ang gaganaping Grand Santakrusan sa Mayo 6 na ay magtatampok kay 2009 Mutya ng San Pablo Jennifer Plerido na kasalukuyang reigning queen ng Lalawigan ng Laguna sa kanyang pagkakapagwagi bilang Binibining Anilag ng Laguna.

Lalahok din sa santacrusan ang Binibining San Pablo, Miss Cocofest 2009 at iba pang nag-gagandahang dilag ng lunsod.

Samantala ay pinananabikan na ng mga residente ang mga mapipiling natatanging anak ng lunsod na pararangalan kaalinsabay ng paggunita sa ika-69 taon ng pagkakatatag ng lunsod, na bilang isang yunit ng pamahalaang lokal ay 362 taon na.

Ang gawad na Ang Mga Namumukod-Tanging San Pableño o The Outstanding San Pableño ay iginagawad sa mga taal na San Pableño na nangag-tagumpay sa kani-kanilang larangan ng kaisipan at gawain, nakapagtala ng pambihirang kontribusyon sa sangkatauhan, at nakapaghandog karangalan sa bayang kanilang sinilangang na tunay na maipagkakapuri at natatangi. (Sandy Belarmino)